Page 90 - MIN TTC 6 APRIL 2016

Posted on 04/5/2016 10:01 pm AST | Updated on 04/5/2016 10:54 pm AST

ORANJESTAD - Tur cos ta practicamente cla pa construccion di un Airport Boutique Hotel
cuminsa, riba un tereno net banda di nos aeropuerto. Mientras cu no ta conoci cua operador
lo maneha e propiedad di 120 camber, NoticiaCla.com a confirma cu e inversionistanan ta un
combinacion di un grupo Venezolano/Mericano. E mandatario di turismo Otmar Oduber a
confirma di e plan aki na NoticiaCla.com awe. Segun e mandatario, gobierno ta sostene e
grupo aki y ta mira dilanti pa un bunita proyecto cu lo beneficia nos turismo.

WARDANDO BOUWVERGUNNING

Mientras cu e parti di estetica di e plannan a keda aproba caba, e inversionistanan ta wardando
awor riba e bouwvergunning di DOW pa nan por cuminsa construccion mesora, mirando cu e parti di
financiamento ya ta aproba caba. Aki no por papia di un problema pa tin mas hotel, segun Oduber,
mirando e meta di e hotel aki. A splica cu aworaki tin turistanan cu ta uza Aruba como hub y ta keda
apenas un of dos dia pa sigui nan destino. Nan tin cu uza camber di hotel cu lo por a wordo uza pa
turistanan di largo duracion y pues por stroba e proceso aki.

MAS META CU SOLAMENTE HOTEL

Ademas, fuera di cu e lo brinda pasaheronan e posibilidad pa un corto estadia, e ta crea
oportunidad tambe pa e companianan di huur auto cu no a keda cla cu tereno y of lugar na
aeropuerto pa nan opera. Aworaki tin apenas 8 of 9 di e total di mas di 40 compania di carrental
segun Oduber, cu ta operando pafo di aeropeurto. Lo crea un parkeergarage unda cu tur e otronan
aki lo por staciona y duna un miho servicio na e turista tambe. Pues e proyecto lo tin mas cu un
funcion, estilo manera cu tin na p.e. Miami.

HOTEL CLA PA FIN DI 2017

E intencion ta pa e construccion cuminsa mesora nan keda cla cu e permiso di construccion, y ta
premira cu pa un proyecto asina, lo por keda cla den un periodo di entre 14 pa 18 luna despues cu
nan cuminsa cu e parti di construccion. Esey ta pone cu pa fin di 2017 of comienso di 2018 Aruba lo
por tin su prome airport boutique hotel.