Page 6 - AWEM 11-Feb-2015

6 AWEMainta Diaranson, 11 Februari 2015

MEP a reuni cu IMF

“No tin ningun
inversion y como tal

tur cos ta stagna”

Falta di informacion di kico Gobierno tin
pensa di haci, segun delegacion di MEP

PARLAMENTARIONAN di MEP Evelyn Wever-Croes y

Xiomara Ruiz-Maduro a reuni cu e delegacion di IMF diamars
ultimo.
“Durante e reunion cu IMF, nos a toca varios tema. E.o. e hecho
cu tur cos ta stagna na Aruba, inversionista y comerciantenan no
ta inverti, cuidadanonan no ta cumpra cosnan di balor, pasobra
nan no sa kico ta bay pasa cu e medidanan na caminda.
E problema mas grandi ta debi n’e falta di informacion di parti di
Gobierno” segun Evelyn Wever-Croes. Locual e Parlamentarionan
di MEP a enfatisa ta cu no solamente falta hopi informacion, sino
cu tin hopi manipulacion di informacion y esey tin tur hende
confundi. Tambe a cuestiona e fuentenan cu algun Minister ta
usa pa informacion, pasobra no ta tur ora ta usa cifranan di CBS.
“Cuidadanonan no ta durf di cumpra un auto, pasobra e no sa
con e medidanan lo impacta nan entrada, pero ora e mesun
cuidadano habri corant e ta mira Prome Minister Mike Eman ta
bisa cu tur cos ta bon na Aruba. E confusion aki tin tur cos pega
na Aruba y nos no ta bayendo ni padilanti ni patras. Mas y mas
nos hendenan ta conciente cu algo mester cambia, asina nos no
por sigi”. ”E posicion di debe di nos pais tambe a wordo discuti, y
e tantisimo proyectonan PPP cu Gobierno ta papia di dje. IMF ta
un instancia cu ta tene cuenta cu e tipo di fiansanan aki tambe. E
tema di “economia berde” tambe a wordo discuti. IMF na 2013
a avisa Gobierno cu e plannan di 100% energia berde no ta
realistico. Awor por constata cu hopi ta wordo papia riba energia
berde, pero no tin ningun resultado. Es mas, e rebaho di prijs di
crudo cu por a duna e pueblo un alivio den prijs di coriente, a
wordo nenga na nos pueblo, debi n’e contract di hedging di WEB.
Y esaki ta stroba nos cuidadanonan di inverti den nos compania”,
segun e delegacion di MEP cu a reuni cu IMF.
IMF tabata hopi interesa pa sa si nos comunidad ta conciente cu
Gobierno ta gastando mas cu e ta ricibi. “Nos a splica cu debi n’e
hecho cu mas cu mitar di nos comunidad ta biba den pobresa,
e prioridad den e hogarnan ta pa sobrebibi cada luna y nan no
ta mucho interesa den e presupuesto di Gobierno, pero berdad
si ta cu tur hende ta di acuerdo cu cos no por sigi asina mas, cu
cosnan mester cambia.Tambe nos a toca e tema di inversionnan,
pasobra ya na 2013, IMF a constata cu ta apenas 1.5% ta bay
den inversion, pero CFT awor a constata cu ta menos di 1% a
bay den inversion. Nos a keda satisfecho di por a delibera cu IMF
riba diferente topico y nos a haya hopi informacion, y nos ta keda
pendiente p’e raport final” Evelyn Wever-Croes a duna di conoce.
IMF lo emeti un comunicado di prensa fin di e siman aki, y e
raport mes ta keda cla dentro di dos luna.