Page 7 - MIN ECEM_Neat

Dienst Huur- en Consumentenzaken ta informa: Situacion di
Insel Air Aruba pa Consumidonan

Friday, 09 June 2017 11:13
Comparti

Recientemente a sali den medionan di comunicacion local cu corte den prome instancia na Aruba a
declara e compania ‘Insel Air Aruba’ bancarota. Di fuentenan local y internacional no ta hopi duidelijk
ainda kico lo pasa cu ‘Insel Air International’ na Curacao.

Den cuadro di e noticia aki Dienst Huur- en Consumentenzaken kier alerta consumido na Aruba cu kier
cumpra ticket den e periodo aki, cu tanten no tin claridad di ‘Insel Air International’, pa tene cautela ora
di cumpra ticket pa vuelo. Pues, si e aerolinea stop di opera lo tin como consecuencia di no por cumpli cu
e acuerdonan di biahe. E consumido lo mester manda carta pa e curator y puntra pa debolbe e placa.
Esaki ta un proceso largo y sin garantia di haya placa bek. Ora cu corte declara un compania bancarota, e
curator ta haya e ehercicio di trece e activa y pasiva di e compania den bista. E curator lo mester tambe
evalua tur reclamo door di acredornan. Siguientemente e curator, si acaso resta placa, lo determina un
suma y reparti e suma aki entre e acredornan. Esaki ta un proceso cu por tuma hopi tempo y e
consumido pa ley ta un di e ultimo acredornan pa yega na turno.

E consumido su probabilidad di haya placa back por ta chikito of den cierto caso te hasta nihil. Den
cuadro di situacion di ‘Insel Air’ Dienst Huur- en Consumentenzaken kier informa consumidonan cu si
acaso ta asina leu cu e consumido keda perhudica pa motibo di cancelacion di vuelo pa motibo di
bancarota, Dienst Huur- en Consumentenzaken lo saca mas informacion con pa yuda e consumido. Na e
articulo aki bo no por adkiri derecho, pero pa mas informacion riba leynan cu ta trata derecho di
consumido, haci un keho of registra un abuso contra consumido yama of pasa personalmente na Dienst
Huur- en Consumentenzaken na Wayaca 33, tel: 5829914, bishita nos website: www.dhc.aw, “like” nos of
conta un anecdota riba facebook, sigui nos via twitter of e-mail nos na info@dhc.aw.