Page 3 - Min.Jus March 5, 2015

DIAHUEBS 5 MAART 2015 DIARIO PAGINA 9

Castigonan te cu 6 aña
exigi den caso grandi di

hortamento di auto

ORANJESTAD (AAN): Recientemente e caso grandi di ladronicia
a continua na corte di husticia. Ta trata di un caso cu a tuma lugar
riba 22 di Februari y no a keda cla, pasobra e tabata un caso grandi
cu varios documento pa repasa.
E sospechosonan G.V.K., .E.J.A.
R.A.M., S.M.G.y R.A.R. mester a presenta na corte di husticia,
despues cu nan a wordo acusa di ta forma parti di un caso grandi di
hortamento di auto.
Ta trata di un caso, den cual decenas di auto a wordo horta.
Ta asina cu E.A. a wordo acusa di ladronicia di un Yaris,
conhuntamente cu un otro of otronan, riba 13 di Januari 2013.
G.K. a wordo acusa di, conhuntamente cu un otro of otronan, tabatin
un of mas auto den su posesion y/of a cumpra y/of a pasa nan pa
otro, den e periodo di 16 di December 2013 te 14 di Februari 2014,
mientras e tabata cu nan tabata procedente di crimen,
K. y A. y M. y G. y R. a wordo acusa di tabata forma parti di un
organizacion criminal di prome di October 2013 te 14 di Februari
2014.
E.A. a wordo acusa tambe di, conhuntamente cu un otro of otronan,
ladronicia di un auto riba 24 di December 2013, di un auto den e
periodo di 21 pa 22 di Januari 2013 y di un auto den e periodo di 6
pa 7 di Maart 2014.
Ademas di esaki E.A. a wordo acusa di, conhuntamente cu un otro
of otronan, a varios biaha sconde auto(nan) y/of nan rimsnan den e
periodo di 31 di December 2013 te 3 di Februari 2014.
A. y M. ta wordo acusa di, conhuntamente cu un otro of otronan,
ladronicia di un auto den e periodo di 13 pa 14 di februari 2014,
ladronicia di un auto den e periodo di 11 pa 12 di november 2014,
ladronicia di un auto cu number V den e periodo di 20 pa 21 di
januari 2014.
E procesverbal di polis cu huez a tuma su debido tempo pa repasa
a mustra tambe cu M. a wordo acusa di, conhuntamente cu un
otro of otronan, ladronicia di un auto riba 17 di september 2013
y di ladronicia di un auto cu number D den e periodo di 1 pa 4 di
november 2013.
Varios acusacion mas tabata tin den e procesverbal y huez a tuma
full Diabierna pa repasa esaki.
Segun O.M, e grupo aki tabata uza un ‘garage’, cu ta un pida
tereno cera, pa desmantela e autonan di biaha despues cu nan horta
esakinan.
E garage aki ta situa den Golfweg na San Nicolas.
Den cercania di e pida tereno aki, a haya un cantidad grandi di
autonan horta, di cual varios pieza a wordo kita.
Locual ta wordo hasi exactamente cu e piezanan no tabata full
cla, pero polis a logra haya sa di un lugar di warda pertenencianan
(‘opslagplaats’) den Cayenne Mall riba nomber di un di e
sospechosonan y eyden a topa cu varios pieza di autonan horta.
Diamars tratamento di e caso a sigui y e parti di R.A.M no a wordo
trata, door cu su abogado tabata malo y no por a bay corte.
E otro partinan di caso si a wordo trata, despues di cual fiscal a hasi
su exigencia di castigo y e abogadonan a trece dilanti nan defensa.
Fiscal a exigi contra G.V.K. 38 luna di cual 10 ta condicional.
Contra E.J.A. fiscal a exigi 48 luna di castigo, contra R.A.R el a
exigi 40 luna y contra S.M.G fiscal a exigi 6 aña di castigo.
Den e caso aki a hasi uso di combersacionan di tap y e abogadonan
di e acusadonan a bisa huez cu e hecho cu e esnan cu a reconoce e
stemnan graba no ta experto den e tereno aki, ta pone cu esaki no
por wordo uza.
Fiscal sinembargo a mustra riba e hecho cu esey no ta para ningun
caminda den ley y Hoge Raad tampoco ta bisa esaki.
E fiscal a trece dilanti tambe cu e abogadonan no a trece dilanti
hurisprudencia relevante cu ta mustra cu expertonan ta esunnan cu
mester reconoce e stemnan cu a wordo graba.
Na final huez a indica cu e lo duna su veredicto dia 24 di Maart.