Page 12 - KPA 14Jan'15

2 AWEMainta Diaranson, 14 Januari 2015

Consul a bin for di Corsou ayera pa sa

Dicon victima di atraco
no ta hayando debido

atencion medico

TABATA den anochi di dia 5 di januari ultimo, cu un Chinees a bira victima di un caso di atraco.

Esaki a tuma lugar na Bo Chang Wing Supermarket, cu ta keda den Weststraat.
Un di e Chineesnan den e establecimento a haya un tiro den su lomba y e anti-socialnan a dal’e
cu un obheto duro den cabez, habri esaki, pa cual den prome instante a kere cu e lo a haya tiro
den su cabez.
E prome anochi, e victima a keda interna den Cuido Intensivo, pero su siguiente dia a ser manda
piso.
Aparentemente for di e dia ey, e victima no a haya atencion medico mas, y esaki a yega orea di
Asociacion di Comunidad Chinees na Aruba, cu a dicidi di pidi intermediacion di Consul General
di China pa area di Caribe, kende recientemente a keda estableci na Corsou.

E Consul General Chinees, sra. Cheng a yega Aruba ayera merdia, cu intencion pa reuni cu e.o.
Minister di Salubridad Publico, dr. Alex Schwengle pa haya contesta pakico e paisano Chinees
aki no ta hayando atencion medico manera desea. Siendo cu e tin seguro di AZV.
E autoridad di Gobierno di China a keda di reuni tambe cu Gerencia di Hospital, p’e mesun
motibonan, esta pa sa kico ta pasando, cu e victima no ta hayando atencion medico.

E Consul General kier intermedia, prome cu salud di e paisano sigui deteriora, cu manera men-
ciona, ainda e bala ta den su curpa, di acuerdo cu informacionnan recibi.
E Consul Chinees lo kier reuni tambe cu autoridadnan hudicial, p’e por haya informacion con
leu e investigacion di e caso aki ta?
Si tin algun detencion of no? E no kier pa ripiti loke a sosode na Corsou, unda un hoben Chinees
mester a paga cu su bida un caso di atraco.

DEPARTAMENTO DI COMUNICACION

Nos di AWEMainta a tuma contacto cu Departamento di Relacion Publico di HOH, pa sa kico di
berdad tin di loke e Asociacion Chinees ta bisa.
Maske adelanta nos sa cu HOH no ta duna informacion riba condicion di nan pacientenan. Ta
respeta privacidad di cada persona.
Pero riba e pregunta specifico, si nan por sa di e bishita di e Consul General Chinees, mas bien
nan a keda sorprendi. Pasobra nan no sa net net nada, te na momento cu nos a tuma contacto
cu nan ayera mainta.

CONFERENCIA DI PRENSA

Mientrastanto nos a haya invitacion pa un conferencia di prensa na Club Chinees na Caya Ritmo,
unda e Consul General lo elabora riba e caso aki, unda ta spera di haya contesta cu nan tin riba
e caso di tiramento di un Chinees.