Page 29 - MIN TTC Jan 26

Empleadonan di La Cabana awor sa con reconoce dollar falso

Sunday, 25 January 2015 10:31
Comparti

Recientemente La Cabana Beach Resort & Casino a acerca Scol pa Polis E.J. “Watty” Vos cu un peticion
special, cu a resulta den un proyecto piloto cu ta tumando luga e siman aki na e hotel.
Specificamente gerencia y personal kier siña con pa reconoce Dollar Mericano falso, pasobra nan ta
wordo confronta hopi cu esaki y nan no ta suficientemente prepara pa reconoce tur ora si e placa ta bon
of e ta falso. Como cu Scol di Polis a prepara un curso hunto cu Koninklijke Marechaussee pa cu
reconocemento di documentonan falso y esaki ta encera un parti tocante dollar y otro placa falso, nan a
dicidi di tuma e oportunidad pa “reach out” tambe den comunidad y comparti e informacion aki. Director
di Scol di Polis E.J. “Watty” Vos, esta Drs. Jeannette Richardson-Baars a splica cu La Cabana e dianan
aki ta conta cu e apoyo di un grupo di experto riba e tereno di “documentenherkenning”, kende tambe ta
duna e curso cu yama “Cardoc” na Scol di Polis. E team multi disciplinario ta consisti di instructornan di
e scol mes, di Inmigracion, DIMAS y Kabinete di Gobernador, kendenan hunto ta ofreciendo e curso
cortico di un par di ora na gruponan chikito di gerencia y personal den e boardroom nan di e
hotel. Jeannette Richardson-Baars a splica cu nan ta brinda e guia necesario riba con pa check y reconoce
placa cu ta falso y asina e participantenan por alerta nan superiornan, cu na nan turno tambe por check
e placa y envolvi Polis pa tuma e caso over si ta necesario. Scol pa Polis ta contento cu e iniciativa di La
Cabana Beach Resort, kendenan ta trahando cu gruponan di 15 persona, pa dos presentacion pa dia.
Asina den algun dia nan lo cubri tur e empleadonan den hotel cu ta maneha placa. Meta ta pa e
empleadonan aki ta miho prepara pa reconoce dollarnan falso y preveni cu nan ta acepta e placa aki for
di e huesped. Jeannette Richardson-Baars a bisa cu Scol pa Polis lo sigui ofrece e curso aki cu gusto si
otro hotelnan y negoshinan sinti e necesidad y acerca nan pa esaki.