Page 5 - AWEM 230415

AWEMainta Diahuebs, 23 April 2015 5

A KIBRA RECORD di pasahero
den prome kwartaal di 2015

AEROPUERTO ta hunga un rol esencial den crecemento di

nos turismo, cu ta nifica crecemento di nos economia. Cifranan
di e prome kwartaal ta mustrando mihor di loke nos a spera,
mientras cu e cifranan entre april pa october ta surpasa nos mesun
expectativanan. Ta referi n’e cifranan di cantidad di pasahero y
cantidad di buelo yegando y saliendo for di nos aeropuerto.
E resultadonan di luna di maart 2015 ta aden y a mustra cu tabatin
un crecemento impresionante den e RGP (Revenue Generating
Passengers), o sea e pasaheronan cu ta genera entrada.
E RGP “year-to-date”, esta di dia 1 di januari pa dia 31 di maart, ta
326.136 pasahero. Esaki ta un crecemento impresionante di RGP
comercial di 16.2% compara cu e mesun temporada aña pasa.
Pa loke ta trata e total di buelonan, cifranan di Aruba Airport
Authority N.V. ta mustra cu tabatin 314 buelo mas saliendo for di
Aruba, cual ta un aumento di 32.2% compara cu e periodo “year-
to-date” pa maart 2014.

Un total di 37% di e bishitantenan tabata procedente di Latino
America, cu t’e di dos mercado mas importante pa Aruba despues
di Merca. Bishitantenan for di Venezuela a alcansa 14% di e
total di RGP di Aruba. Norte America a mustra un aumento
impresionante di 14% pa Merca y 21% pa Canada. Bishitantenan
for di Caribe Hulandes a baha cu 3% y di Europa a baha cu un
total di 13%.

Aruba Airport Authority N.V. ta satisfecho di por comparti cu e
trend di crecemento for di e mercadonan mas fuerte di Aruba lo
sigui den e proximo lunanan, cu ta yuda fortalece, re-enforsa y
crece e pilar economico. E total di trafico aereo den e prome tres
lunanan di 2015 a kibra tur record cu 16.2% di crecemento di
RGP. AAA N.V. den su pronosticonan, basa riba e aumento den
cantidad di buelonan, lo experencia mas crecemento, esta di
14% den e cantidad di capacidad di stoel. Esaki lo ta un total di
112.665 cupo adicional compara cu zomer di 2014.
E terminal di Aeropuerto cu nos conoce awe ta construi desde
aña 1972, pero a conoce un renobacion completo na aña 2000.
AAA N.V., trahando den relacion estrecho cu Schiphol Group,
ta maneha un Aeropuerto moderno y eficiente, cu tres diferente
edificio cu hunto ta forma e terminal. Nos Aeropuerto ta conta cu
66 ticket counters, oficina pa aerolineanan y centro di compras
pa pasaheronan biahando pa Merca y pa otro destinacionnan.
Nos ta un di e poco paisnan na mundo cu tin presencia di e
facilidad di U.S. C.B.P, esta Inmigracion y Aduana Mericano riba
nos isla, pa facilita pasaheronan y “pre-clear” buelonan prome cu
nan yega Merca.

Na aña 2014, Aeropuerto di Aruba a maneha mas di 2.5 miyon
pasahero, cu a ensera un crecemento di mas di 10% compara cu
e aña prome. P’e aña aki, AAA N.V. ta premira di lo sigui crece,
tanto den cantidad di buelonan y cantidad di pasahero cu ta pasa
dor di e terminal.