Page 13 - AWEM

AWEMainta Diamars, 12 April 2016 13

Cabesante Mario Tromp di
Colegio San Antonio

Nos ta super
orguyoso
di nos scol
renoba

Sistema di coriente moderno,
airco den tur klas y cu Wifi pa

henter e scol

NA aña 2001, Colegio San Antonio tabata conta cu

algo mas di 250 alumno n’e scol, pero a crece hopi
te cu awe nos ta conta 421 alumno n’e scol. Na aña
2012 a haya nan cu un problema n’e scol den e lokaal
di Biologia pa cual a sera un hala di e scol.
E tempo ey den forma urgente, mester a bay uza
algun barak den cura di e scol. Na aña 2013 a muda
pa Centro di Bario Dakota, mientras a cuminsa traha
riba e scol mes.

“Mi ta super contento, super orguyoso, cu nos ta den
nos cas bek. No solamente nos scol ta renoba, pero
tecnologia ta nobo tambe. Aworaki nos tin un sistema
nobo y moderno di coriente, tur klas tin airco, tin
sistema di WiFi pa henter e scol.
Nos no a djis muda den un scol, sino den un scol
moderno”, asina Mario Tromp, Director di Colegio
San Antonio a duna di conoce.

E scol a cuminsa oficialmente na aña 1959, bou
maneho di Zuster Cecila. A cuminsa cu dos lokaal na
Maria School e tempo ey, mientrastanto a cuminsa
construi nan propio edificio cu despues a bira St.
Antonius College, cu a habri na aña 1960.
Desde e tempo ey a bira e prome scol mengua, den
cual tabatin mucha homber y mucha muher hunto.
N’e mesun edificio a start cu nan mesun klas di HAVO
cu e tempo ey nan tabata yama HBS y tabata duna les
atardi of anochi. Cu tempo a combina ETAO cu MAVO
y na caminda a start EPB y na mes momento ETAO a
sali for di MAVO.

Na aña 1977, Esteban Solognier a bira Director di e
scol. Na momento cu Zuster Cecilia a stop di duna les y
a bandona scol, a ofrece pa yama e scol na su nomber,
como esun cu a funda e scol, pero el a nenga y a prefera
pa mantene e nomber, pero cambi’e na Papiamento.
Asina a cambia e nomber pa Colegio San Antonio cu
t’e patrono di studiantenan.
Desde aña 2001, meneer Mario Tromp ta Director di
Colegio San Antonio y ta trahando duro pa hiba e scol
padilanti.