Page 14 - MIN SJA 14 OCT 2015

26 AWEMainta Diaranson, 14 Oktober 2015

Revista di Suecia ta
publica articulo amplio
di Grupo Scout Sonrisa

TA cu un gran sinti di orguyo y satisfaccion cu Grupo Scout Sonrisa ta

anuncia cu nan trabou pa formacion y bienestar di nan miembronan a
hala atencion te na Europa, pa cual motibo e grupo ta den e edicion mas
nobo di e revista ‘Scout’.
Esaki ta prome biaha cu un grupo scout di Aruba ta keda ilustra den e
revista.

E grupo di scout cu ta forma pa personanan cu limitacion mental, ta
den pleno celebracion di nan 15 aniversario. Imagen y informacion di e
grupo ta aparece den e publicacion aki cu actualmente ta riba mercado
na Suecia.
Pa su caracteristica special, Sonrisa ta cataloga como un grupo ‘Blauwe
Vogel’ di cual tin solamente algun den henter e region Interamericano.

Tabata den luna di augustus ultimo cu e revista ‘Scout’ a encarga na dos
compania local e tarea di produccion.
Elizabeth Guanipa di Verbum Works a realisa entrevista cu lider y miem-
bronan pa skirbi e articulo, mientras cu e imagennan bunita cu ta com-
paña esaki ta di e fotografo Julien de Bats di One Happy Photographer.
Un reportahe di 4 pagina, tur na color, ta relata e nacemento di e or-
ganisacion, su crecemento y tambe con a yega na tin e sede y tereno di
campa na Pavia cu ta ricibi tur otro grupo scout na Aruba.

Porcierto, proximo fin di siman, lo ricibi mas di 150 mucha y hoben di
Scouting Aruba relaciona cu celebracion di JOTA/JOTI.
Lider di Grupo Scout Sonrisa, sr. Thomas Tromp ta hopi contento y
elogia p’e interes cu nan a ricibi di nan coleganan; mas ainda, for di un
lugar asina leu manera Suecia.
E grupo ta ricibi esaki como un muestra di apoyo p’e trabou cu nan ta
realisa aña aden y aña afo. Si ta desea pa conoce mas di Grupo Scout
Sonrisa, por bishita nan pagina di Facebook of tuma contacto cu funda-
cion Sonrisa na 594-2353.