Page 68 - Min TTC, 4 May 2015

Ministernan Otmar Oduber y Mike de Meza a reuni cu ehecutivonan di Port of
Amsterdam

Publication: Monday, 4 May 2015. Categoria: General

Ta explorando e diferente posibilidadnan cu tin pa desaroyo di nos wafnan

ORANJESTAD (AAN): Diahuebs Ministernan Otmar Oduber y Mike de Meza a reuni cu
ehecutivonan di Port of Amsterdam. Presente na e reunion tabatin tambe ehecutivonan di ATA y
APA.

Minister Oduber a comenta cu na november aña pasa e tabatin e honor den nomber di su colega
de Meza di reuni cu Port of Amsterdam, mira e facilidadnan cu nan tin y durante esakinan tambe
tabata presente ex director di APA y actua Minister Plenipotenciario na Hulanda, Alfonso
Boekhoudt.

Despues di esaki a sigui diferente reunionnan y recientemente na Aruba Minister de Meza hunto
cu Prome Minister a firma un MOU cu Port of Amsterdam pa explora e diferente posibilidadnan
cu tin mirando e experticio di Port of Amsterdam.

Minister Otmar Oduber a duna di conoce cu awor finalmente, despues cu pa hopi aña a papia
riba dje, pero no a logra, mudamento di waf di container pa Barcadera ta tumando lugar y dentro
di poco e operacion completo ta cuminsa na Barcadera. Esaki ta sinifica un oportunidad unico pa
waf di Playa cu mester wordo bon planifica unda cu e desaroyo cu wordo estableci eynan mester
ta uno duradero mirando cu e ta bay ta e cara di nos turismo crucero, sigur pa e proximo 60
añanan.

Pesey e ministernan ta reuniendo y papiando cu diferente grupo pa por sigura cu e decisionnan
cu ta wordo tuma pa e area aki ta esunnan di mas beneficioso pa Aruba, pero cu ta acopla tambe
cu e industria di turismo crucero. Es decir, pa e ta un balor agrega na Producto Aruba y no cu e ta
sin mas un desaroyo economico-financiero no duradero pa nos pilar economico.

Minister Oduber ta contento cu e conversacionnan ta bayendo den un forma habri, “mi ta kere tin
hopi idea, tin hopi plan y instancianan interesa. Port of Amsterdam tin un experiencia grandi di
partnership na mundo cu otro instancianan y mi ta kere cu esey lo bira e exito na Aruba”.