Page 56 - MIN ON 21 SEPT 2015

Hopi pregunta riba contract y salario barbaro entre SMOA
y Rector nobo di Colegio Arubano

Publication: Monday, 21 September 2015. Categoria: General

Ta pag’e un salario mas halto di loke Gobierno ta subsidia

ORANJESTAD(AAN): Un carta pisa di Departamento di Enseñansa, fecha di dia 22 di januari
2015 a cay den box di DIARIO, den cual por mira claramente cu SMOA, Stichting Middelbaar
Onderwijs Aruba, e fundacion cu ta maneha Colegio Arubano, a haci un peticion pa Gobierno
paga Drs. L.J. “Hans” Timmermans, Rector nobo na Colegio Arubano, un salario di riba 50 mil
Florin mas di locual Gobierno ta subsidia.

Si acaso SMOA paga e docente Hulandes e salario aki, anto e lo bira e Rector miho paga na
Aruba!

Tin varios otro Rector riba nos isla, entre otro na Colegio San Nicolas y na Universidad di
Aruba. Nan no a core e mesun suerte di tin un fundacion asina royal ora ta paga salario di e
cabesantenan di e school cu nan ta maneha.

E Rector di Colegio Arubano a haya un contract di trabao prome cu a manda pidi Gobierno
aprobacion pa e subsidio, pues a aproba esaki dentro di SMOA, firma contract cu Rector nobo, y
despues manda Minister di Enseñansa un carta oficial pidiendo pa e salario worde subsidia.
Informacion ricibi ta mustra cu e Minister no a duna aprobacion pa e salario barbaro y a mustra
SMOA riba kico ley di subsidio ta permiti y a desaproba e suma cu nan a ofrece e Rector.
Entrante dia 1 di mei 2015, Drs. Hans Timmermans di 59 aña di edad a asumi e funcion di
Rector di Colegio Arubano cu un salario di Afl. 207.065,= pa aña, cu ta traduci su mes den un
salario mensual di Afl. 13750 pa luna mas beneficionan secundario. E locual a hala masha
atencion ta e hecho cu ta paga e Rector nobo mucho mas di locual a paga nos propio yiunan di
tera y mas cu e Rector suplente cu a traha pa 2 aña y 3 luna mientras tabata wardando
nombracion di un Rector nobo. E Rector nobo aki ta gana sigur mas di 40 mil Florin pa aña, mas
cu e Rector H. Van Tuijl cu a wanta e funcion mientrastanto.
Comosifuera poco, pa muda e Rector nobo pa Aruba y pa mande back Hulanda despues di 5 aña,
ta costa un otro Afl. 67.160,= na gasto di pasashi, acomodacion, mudamento, etc. Ey tambe e
departamento di Enseñanza ta haya cu SMOA ta exagera enormemente!
E decision di SMOA, no solamente ta cuestionabel pero tambe a comete algun eror grave. Entre
otro a tuma un Rector di 59 aña di edad, mientras cu leynan di Gobierno ta bisa cu
Ambtenaarnan mester bandona servicio cu 60 aña di edad. Ta cuestiona e ora con por a cera un
contract di trabao di 5 aña siendo cu e chens ta grandi cu otro aña Gobierno lo para e subsidio di
salario di acuerdo cu e “Landsverordering Leeftijdsgrens Ambtenaren”.
Cu e ultimo acontecimientonan na Colegio Arubano, den cual e Rector nobo ta purbando pa haci
cambionan drastico, a causa cu Meneer Capelo a dicidi di tuma retiro. A suspende alumno cu a
tent’e riba Facebook y asina por sigui menciona e lista creciendo di hechonan na e school. Cu e
asunto di salario aki tambe awor, ta bisto cu Gobierno mester ta hopi mas envolvi den e tipo di
decisionnan asina, sino ta purba corta gasto un banda mientras cu na Colegio Arubano e Rector