Page 64 - MIN ON 21 SEPT 2015

Colegio/SMOA mester dedica menos tempo
na 'school shaming'

Posted on 09/21/2015 10:06 am AST | Updated on 09/21/2015 10:21 am AST

ORANJESTAD – “E responsabilidad como minister di enseñansa ta obliga mi pa envolvi
mi mes den Colegio Arubano” asina e minister di enseñansa Michelle Hooyboer Winklaar
a reacciona riba declaracionnan recien di e rector di Colegio Arubano. “Mi a tuma nota di
e declaracionnan haci door di SMOA/Rector di Colegio Arubano, y mi ta lamenta cu nan a
scohe pa mira e rol di minister di enseñansa como un di "metemento".

OBLIGACION

Segun e mandatario, e tin un obligacion y responsabilidad pa ta envolvi den tur scol, vooral ora
ta trata scolnan cu ta ricibi subsidie di Gobierno. Esaki ta conta tambe pa Colegio Arubano, pa
cual ta ricibi gran mayoria di nan gastonan subsidia. “Como minister di enseñansa mi lo keda
monitoria y envolvi mi mes ora ta necesario, y traha cu instancianan manera Inspectie cu tambe
tin un base legal pa sa kico ta pasando na Colegio Arubano, vooral si tin preguntanan riba
calidad of incidentenan manera a sosode algun siman pasa”. E mandatario ta sigui mustra cu
ademas, anda di esaki, e ta carga e responsabilidad pa cu interes general di tur alumno na Aruba.
“ Esaki ta netamente pakico a introduci normanan nacional pa drenta HAVO, y no ta permiti
cada scol dicidi e condicion di admision pa studiantenan cu ta bin for di MAVO”.

DEDICA MAS TEMPO INTERNO

E mandatario a mustra cu e ta spera cu SMOA y e Rector di Colegio Arubano por dedica mas
tempo na traha interno pa drecha loke no ta canando optimal en bez di dedica asina hopi energia
na "school shaming" door di a publica supuesto presentacion di scolnan basico, punta dede riba
tur scolnan di MAVO, y focus riba kico nan mes por drecha na Colegio Arubano na bienestar di
tur studiante y docentenan.

http://www.noticiacla.com/news/3943