Page 25 - AWEMAINTA

AWEMainta Diahuebs, 6 Juli 2017 25

Presentacion di

ahedres dor di IM Jose

Sequera na scolnan

PROME cu IM Jose Sequera a bandona Aruba
dialuna ultimo, el a duna presentacion na algun scol
basico pa laga muchanan cera conoci cu e deporte di
ahedres. E interes di e muchanan tabata hopi grandi.
E muchanan a haci monton di pregunta y ta mustra
cu si nan haya e oportunidad di nan mayornan pa
hunga e deporte aki, cu nan por gosa di esaki.
Ta un lastima cu e biaha aki nos no a logra alcansa
mayornan di e muchanan pa papia cu nan over di tur
e bentahanan cu hungamento di ahedres tin y pa pidi
nan stimula e mucha p’e hunga e deporte aki.

Ta comproba cu hunga ahedres ta e. o. desaroya e
concentracion, memoria, abilidad pa resolve prob-
lema, subi bo IQ, mehora abilidad pa lesa, mehora
creatividad, etc., pues por tin un influencia suma-
mente positivo rib’e desaroyo di e mucha.
Na final di e presentacion a regala e scolnan un set
di ahedres p’e muchanan interesa por cuminsa wak
e deporte aki mas di cerca.
Tur mucha cu kier cuminsa cu e deporte aki por join
nos club na Nieuwstraat 11, Oranjestad despues di
vakantie. Por yama na telefon 594-5590 of e-mail na
ocroes@hotmail.com.

Rib’e potretnan por mira e interes grandi cu ta existi
bou di e muchanan di Sint Michael School na Brazil
y na Colegio Laura Wernet na Cadushi Largo.