Page 20 - Djaweps 5 yuli 2018.pdf

20 Djaweps 5 Yüli 2018
MUNDU DEPORTIVO

Puerto Rico 11, Kòrsou Pabou 7
Puerto Rico tabatin 9 hit ku 2 eror. Edwin Delgado a gana i e mes a bai di 3-2. Pa
Kòrsou Pabou 3 hit ku 3 eror. Arlyson Rodriguez a pèrdè. Roangeraud Fraai bai di 3-2.

Amigunan di Jump Serve, saludo. Danki pa ta sigui
nos awe tambe. Un bia mas nos tei pa tene bo informá
di tur loke ta pasa paden i rondó di Volleyball tantu lokal
komo internashonal. Ban pe...
Awe Christine Anthony i Samira Luis a regresá Kòrsou
despues di a pasa un siman na Ulanda pa pasa den un
régimen di preparashon pa nan ta den forma óptimo pa
e kompetensia di vòli di playa CAC Baranquilla 2018.
E siman tabata realmente pisá pa e duo aki, pero
nan a sa di hasi bon uso di e oportunidat ku a presentá
dunando tur ku tin pasando den e programa ku tabatin
prepará pa nan.

Un dia despues di nan yegada nan a haña un bon
drill di un coach brasilero ku ta den servisio di NeVoBo.
E siguiente dia nan mester a biaha 3 ora pa bai kompetí
den un torneo di playa den Top Divisie di Nevobo. E nivel
aki tabata realmente haltu pero nan a duna bon bataya,
ounke a keda kòrtiku na punto den e weganan ku nan
a hunga.
Despues nan a sigui haña diferente training pa
fortifiká e partinan ku kua nan tabatin difikultat. All by
all nan por mira bèk riba un siman fruktífero durante
kua nan a haña guia profeshonal den e parti táktiko,
tékniko i tambe mental di e wega.
Beach Volley su kompetensia ta start 28 di yuli na
Baranquilla i lo dura te promé di ougùstùs. Pues 5 dia di
kompetensia pisá kaminda den ámbos sekso ta bai tin 6
pull di 4. E modèl di skema ya ta kla pero ta den reunion
tékniko ku lo tuma lugá un dia promé ku e weganan start
e nòmber di e paisnan ta wòrdu yená den e skema. Lòt
mester bai definí algun posishon i esaki mester tuma
lugá den presensia di un representante di kada pais.
Mientrastantu, federashon ta pendiente pa instalá un
kantidat di Referee i Scorer ku a pasa nan pruebanan ku
éksito i pronto nan lo fortifiká e kuerpo di ofisialnan ku
ta dirigí e weganan. E grupo nobo aki lo haña sufisiente
oportunidat pa dirigí weganan no ofisial promé ku e
temporada nobo kuminsá. Esaki pa nan ta trankil i stabil
ora nan haña wega grandi pa flùit.
Pabien na e ofisialnan aki ku den nan mayoria ta
hóbennan ku stima e deporte di vòli aki. Tirando un bista
den region, den wikènt tras di lomba, Sürnam tabata
anfitrion pa e di 17 kompetensia Femenino Senior di
CAZOVA.

Trinidad & Tobago a kue Oro pa di 6 aña konsekutivo
ora nan a gana Sürnam den final miéntras ku Barbados
a bai ku bròns lagando Bahamas ku man bashí. Kòrsou
no a inskribí pa partisipá den kompetenshanan senior e
aña aki dor ku e rekursonan finansiero ta hopi limitá.
E enfoke a bai pa e salida di U23 i weganan CAC. Oké,
ta basta pa awe tin yen kos mas pero a sobra espasio
solamente pa yama ayó i deseá bo tur kos bon. Kaba ku
loke bo kuminsá i kuminsá loke bo ke pa kaba.
...Akshon di wega entre Kòrsou Pabou vs Puerto Rico...