Page 73 - MIN TTC AUG 28

8 AWEMainta Diabierna, 28 Augustus 2015

Parlamentario mr. Xiomara Maduro:

Minister Eman no tin e boluntad
pa conserva ni defende e honor y

dignidad di e pueblo aki

E ta prefera di entrega su responsabilidad pa otro dicidi pa nos pais

GABINETE Eman a hiba un mal maneho financiero cu a pone cu nos pais a

conoce cifranan di deficit y di debe nunca antes bisto.
E debe di nos pais a acomula den 23 aña a redobla den solamente 4
aña di tempo. Esaki ta pone un presion grandi riba nos finanza
publico caminda cu gastonan di interes ta tuma un parti grandi
di nos fondo publico y ta pone cu no ta resta espacio financiero
suficiente pa inversionnan necesario den enseñansa, seguridad
y salubridad. Na palabra e miembro di MEP, mr. Xiomara
Ruiz Maduro.

E deroche di fondo publico a bay completamente for
di man te cu a pone cu companiannan di rating ta
downgrade nos pais indicando cu nos pais ta core risico
grandi di no por paga bek nos debenan.
E mal maneho financiero aki a brinda Hulanda a base
di nos Statuut e chens pa interveni na nos pais den
forma di supervision financiero di CFT.
Y como cu Gabinete Eman a mustra di no tin e boluntad
pa stop di derocha e placa di pueblo y tampoco tin e
boluntad pa drecha e desaster cu nan a haci, a pone
cu awor nan ta bay entrega e autoridad di e pueblo
aki pa dicidi riba nos propio cartera, nos autonomia
financiero, bek den man di Hulanda.

Cu e entrega aki, Gabinete Eman lidera pa Minister
Mike Eman ta tira afo e lucha di pueblo aki pa por dicidi
pa nos mes y ta baas den nos mesun cas.
Si Gabinete Eman a goberna drechi, y anda na un
manera responsabel cu e confiansa cu pueblo a
deposita den nan, no tabatin mester a entrega ningun
autoridad na Hulanda.

Pero ta bisto cu Minister Eman no tin e boluntad pa
conserva ni defende e honor y dignidad di e pais aki,
pero ta prefera sigi actua manera un gobernante
iresponsabel entregando su responsabilidad den man
di Hulanda pa nan drecha e situacion sin worry cu
e pueblo lo wordo perhudica malamente na man di
medida, ta opinion di mr. Xiomara Ruiz Maduro.