Page 4 - POST ARUBA DEC 9,2015

Post Aruba N.V. ta introduci “Electronic Proof of
Delivery”
Tuesday, 08 December 2015 21:16
Comparti

A base regular Post Aruba N.V. ta haci tur locual ta posibel pa por promove mas eficiencia y pa por
entrega carta, paki of carga mas lihe posibel na clientenan. Den esey ta purba acelera e proceso pa e
sosode cu mas rapidez, banda di un sistema den cual ta garantisa cu a ricibi e pakete na otro banda. Ta
p’esey a lansa e producto nobo "Electronic Proof of Delivery".

Un di e prome clientenan cu lo haci uzo di e servicio moderno, pero sigur aki, ta Servicio di Impuesto
Aruba, SIAD. Pa prome bes nan lo parti tur envelopnan cu cobransa di "Winstbelasting" via Post Aruba
N.V., cu awor por garantisa cu ta entrega e envelop den e tempo acorda y por prueba ki ora, unda y ken a
ricibi e envelop tambe.

Post Aruba N.V. a ricibi un total di 7261 envelop pa parti na Aruba y 109 envelop cu mester bay pa
diferente destinacion den exterior. E servicio ta inclui cu cada partido di carta ta haya un tablet, cu nan ta
hiba cu nan pa e ciudadano por firma den forma digital riba dje. E sistema ta raporta ki ora, na ki adres y
e persona ta firma pa ricibi e envelop. Esaki ta sirbi como "prueba" pa e cliente, den e caso aki Servicio di
Impuesto, pa ta sigur cu e envelop a yega su destinacion.

Pa Post Aruba N.V., e sistema nobo ta bira un servicio adicional pa usuarionan di nos compania nacional
di post. Tur cliente, specialmente comercial, por pidi un garantia cu firma, orario y adres unda a entrega e
envelop. Hopi biaha un secretaria of bode ta tuma envelop pa e compania pero no ta entreg'e na e persona
concerni. Esey ta haci cu lamentablemente e culpa ta bay riba Post, comosifuera cu no a entrega e envelop
mes. Cu e sistema nobo tur esey ta pa pasado!

A funda e compania priva Post Aruba N.V. na aña 2005. Su oficina principal ta situa na J.E. Irausquin
Plein # 9 na Oranjestad y tin 3 oficina adicional na Santa Cruz, Noord y San Nicolas. Ey ta ofrece tur tipo
di servicio, for di manda un envelop, te na carga pisa, sin lubida nan servicio di manda placa via Western
Union. Post Aruba N.V. ta conta cu 111 empleado, cu diariamente ta yega na 42 mil adres situa tur rond di
nos isla. Mas cu djis un servicio, e empleadonan atento ta percura pa tanto comunidad como sector
comercial por comunica cu otro.

Pa mas informacion riba servicionan di Post Aruba N.V., bishita e website www.postaruba.com of check
nan paginanan riba Facebook, cu ta E-Post Aruba y Aruba Stamps.

http://www.24ora.com/local-mainmenu-5/102992-post-aruba-nv-ta-introduci-electronic-proof-of-
delivery