Page 31 - MIN ON

E caso ta encera cu dia 20 di maart 2015, Director di Dienst Publieke Scholen a dicidi di
suspende Juffrouw Suki pa 5 dia manteniendo su salario; A kita su funcion temporal di
docente den 6de klas na Scol Primario Kudawecha pa e resto di aña escolar; Duna e
juffrouw un otro funcion te ora e aña escolar caba y tambe pa e juffrouw sigui un
trayecto di guia bou auspicio di su cabesante, of di e departamento special di Directie
Onderwijs of door di su dokter di cas.

Desde dia 17 di april 2015 caba e juffrouw di scol a apela contra e decision aki na Corte
di Ambtenaarnan.

Manera ta conoci, a nombra un comision di investigacion den cual expertonan den
enseñansa a conseha Minister pa tuma tal decision pa cu e docente aki, debi na su
forma no profesional y no pedagogico di atende cu alumnonan di su klas na Scol
Primario Kudawecha durante e aña escolar 2014-2015. A tene cuenta cu e comision no
a investiga solamente e trato specifico di e un alumno aki, sino tambe di henter e forma
con directiva di scol ta atende cu docentenan nan forma di trata mayornan y
alumnonan den klas, specialmente cu alumnonan cu ta rekeri extra atencion. Mirando e
“opvliegendheid” di e docente pa cu alumnonan, a rekeri cu e mester haya guia y
tambe a atende cu director di scol y cu Dienst Publieke Scholen.

Corte den e caso aki ta sinti cu e conclusion di e comision di investigacion ta laga di
desea. No ta parce cu e docente aki tin un problema structural di comportacion, sino a
keda specifico na un solo caso individual con el a trata un alumno y su tata na scol. Cu
otro docentenan a bisa cu e tin un mecha cortico berdad, no ta motibo pa saca e
conclusion cu e mester haya guia profesional pa su actitud y forma di duna les na scol.

Ta den e cuadro aki, Hues ta haya cu e Juffrouw tin rason den su demanda contra e
decision di Minister. Consecuentemente Corte a destrui e decision di Minister di Juni
2015 y ta obliga Gobierno paga gastonan di Corte balora na 2 mil florin.

Mester menciona cu abogadonan di Gobierno no a keda satisfecho cu e decision y ta
conseha pa apela. Minister Michelle Hooyboer no ta na Aruba y tin cu evalua awor si lo
tuma e caminda ey.