Page 19 - Awe Mainta 22 Jan 2022

AWEMainta.com DIASABRA 22 JANUARI 2022| 19

UN SNECHI DI PALABRA DI DIOS

III DIADOMINGO DEN AÑA 23.01.22 #347

I lectura: Neh 8, 2-6.8-10
Salmo 19
II lectura: 1Cor 12, 12-3

Evangelio: Lc 1, 1-4; 4, 14-21

Distinguido Teofilo, hopi hende a haci esfuerso pa traha un compilacion di e cosnan cu a sosode memey di nos.
E hendenan aki a raporta e echonan di acuerdo cu loke testigo a conta nos; nan tabata testigo for di un principio
y despues a bira predicado di e mensahe. Ami tambe a haya bon di skirbi un historia ordena pa bo, despues di a
investiga tur cos cuidadosamente for di un principio. Asina bo por ta sigur cu tur loke bo a siña ta berdad. Hesus a
regresa Galilea yena cu poder di Spirito Santo. Su fama a plama den henter e bisindario ey. E tabata siña e hendenan
den nan sinagoganan y nan tur tabata gab’E. Hesus a bay Nazaret, caminda El a lanta como mucha, y riba sabat El

a bishita sinagoga manera custumber. El a lanta para pa E lesa Scritura. Nan a dun’E rol di buki di profeta Isaias pa
lesa. Hesus a habri e rol di buki y haya e parti cu ta bisa: “Spirito di Señor ta riba Mi, p’esey El a scoge-Mi pa anuncia
e bon noticia na hende pober. El a manda-Mi proclama libertad pa preso; bista pa esnan ciego; y pa esnan oprimi,
libertad. Mi mester anuncia e era di Señor su gracia.” Hesus a lora e rol cer’e bek, dun’e na asistente di sinagoga y
cay sinta. Tur hende den sinagoga a keda cu nan bista fiha riba djE. E ora ey El a cuminsa papia cu nan; El a bisa:
“Awe e palabranan cu boso a tende, a keda cumpli.”

Palabra di Señor.

MENSAHE

Evangelio di awe ta referi na e inicio di actuacion publico di Hesus. E momento aki a keda
anticipa cu e 40 dia den desierto y momentonan largo di oracion. Asina cu Hesus no a prepara
su mes pa e trabou pastoral den un scol, cerca algun maestro, sino pa medio di contacto
directo cu Dios den oracion. Su preparacion a consisti den:
- Huntamento di Spirito Santo
- Oracion
- Mandato di Dios Tata.

Un di e prome destinonan di evengelisacion ta su mes pueblo. E ta bay den e sinagoga di Nazareth. Ta manera un
primicia – Hesus adulto, bon prepara comparti palabra di Dios cu su mes hende.
Pero E ta reconoce cu e texto cu El a lesa ta bon p’E y cu e ta papia di djE mes. E ta esun ungi pa Spirito Santo. E
ta anuncia palabra di Dios y practica obra di caridad. Den e texto aki E ta mira su mes, p’esey E ta bisa cu: “Awe e
palabranan cu boso a tende, a keda cumpli.”
Pa nos ta efectivo den proclamacion di Palabra di Dios, mas cu estudio nos tin mester di oranan largo di oracion.
Na prome luga nos mester practica nos fe den nos misanan parokial. Tambe nos mester trata cada palabra cu nos
ta scucha como un palabra personal.
Hopi biaha nos ta bisa cu un palabra ta bon pa otro, e actitud aki no ta corecto. Nos mester tuma cada palabra pa
nos mes y guia pa Spirito Santo biba e palabra, pa otro hende cu ta scucha nos y mira nos manera di biba por bisa
cu e palabra cu e ta tende ta haya su cumplimento. Den realidad cada un di nos mester evangelisa otro cu nos

manera di biba. Tin biaha nos bida ta e unico bijbel cu ta accesibel pa otro hende.

ORACION

Papia Señor, bo sirbido ta scucha.

PROPOSITO

Analisa bo participacion den actividadnan spiritual di bo parokia.