Page 91 - AWEMAINTA19AUG

impuestonan cu no (of minimalmente) ta contribui na caha di gobierno y uza e recursonan cu
ta bin liber pa mehora e control riba cumplimento cu nos leynan di impuesto.

E di cuarto elemento ta cu lo introduci un sistema caminda cu lo por restitui placa cu e
ciudadano a paga dimas na belasting den un tempo cortico. E di quinto elemento ta cu lo
introduci incentivo y instrumentonan fiscal nobo cu e meta pa stimula inversionnan den
sector priva cu ta contribui na crecemento y diversificacion economico, empleo di calidad y
mas entrada pa gobierno. E di sexto elemento ta cu pa un periodo di 1 aña lo reduci impuesto
riba dividendo te na 0% bou di e condicion cu por lo menos 50% di e suma cu ta wordo
paga como dividendo na e accionistanan mester wordo inverti den un fondo di inversion pa
desaroyo di sector tecnologico pa un periodo di minimo 5 aña.

E di septimo elemento tin como meta specifico pa mehora e posicion di nos penshonadonan.
Lo percura pa e penshonado no mester paga impuesto riba su pensioen di biehes di SvB
ora e tin entradanan adicional (for di otro pensioennan of otro fuentenan). Ademas lo
elimina e inhusticia cu actualmente penshonadonan mester paga tanto e parti di trahado
(“werknemersdeel”) como e parti di dunado di trabou (“werkgeversdeel”) di e primanan di AZV
y pensioen di biehes.

2.9.4 Mehora control y transparencia

Pa un democracia por funciona bon ta necesario y importante pa tin un sistema di “checks
and balances” cu ta funciona bon y ta preveni, of en todo caso limita grandemente e
probabilidad, cu gobernantenan ta tuma decisionnan descabeya of iresponsabel cu no ta
na interes general di nos pueblo. Den e cuadro aki lo duna respet y e recursonan necesario
na e organonan di conseho y control cu ta forma un parti asina importante di nos sistema
democratico. Aki ta referi na Raad van Advies, Algemene Rekenkamer Aruba (ARA), Centrale
Accountantsdienst (CAD) y Sociaal Economische Raad (SER).

Segun nos Constitucion Parlamento ta e organo mas halto di nos pais y tin e tarea pa controla
gobierno, pero den practica pa hopi aña caba nos conoce un “stempel parlament” unda cu
parlamentarionan cu ta sostene gobierno ta subordina na dje y ta wak como nan unico tarea
pa sostene y defende gobierno bou di tur circunstancia. E practica aki, cu a haci hopi daño na
nos pais, entre otro riba tereno di finansas publico, mester stop y POR lo percura pa esey.

Ta papia pa su mes cu pa logra esaki, e ta rekeri un cambio fundamental di mentalidad den
nos sistema politico. POR ta tuma na su encargo pa guia y stimula e proceso di cambio di
cultura politico di nos pais door di duna e bon ehempel pa otronan sigui y door di conscientisa
nos comunidad di e importancia pa nos tin un Parlamento cu ta cumpli debidamente cu su
tarea di controla gobierno.

48