Page 55 - TTC MAY 13

Minister Otmar Oduber a inaugura Conferencia di YMCA

Tuesday, 12 May 2015 20:20
Comparti

Diamars atardi Minister Otmar Oduber tabatin e placer di duna inicio oficial na e Conferencia Anual di
YMCA pa America Latina y Caribe cu ta conta cu presencia di 46 representante di 16 pais. Tema di e
Conferencia e aña aki ta “YMCA we want”.

YMCA ta e organizacion di desaroyo hubenil mas grandi na mundo, e la keda estableci na 1844 y a yega
na miyonnan di hende di diferente edad, raza y condicionnan social-economico. Manera Minister Oduber
a bisa, “e impacto di e organizacion aki ta uno gigantesco y ta enfoca riba fortalecemento, sosten, apoyo,
dialogo y creacion di sociedadnan”.
Den e cuadro aki Minister Oduber a bisa cu YMCA di Aruba sigur ta un ehempel di e enfokenan aki. E
impacto di YMCA Aruba ta inmenso; for di progamanan di liderazgo te lesnan pa cushina, e
oportunidadnan cu ta wordo ofreci dor di e organizacion local na nos hobennan, ta contribui
grandemente na e bienestar di nos sociedad. “Como Arubiano y mas ainda como tata, ta yenami cu
alegria cu trabounan ta wordo haci pa un mihor mañan”.
Como Minister di Turismo, el a informa e presentenan cu por a mira un crecemento exponencial den e
cantidad di bishitantenan na nos isla, incluyendo for di un di nos mercadonan principal manera ta esun
di America Latina y cu aña pasa nos a surpasa e un miyon turista, cual ta un gran logro.
Hunto cu e crecemento exponencial, ta bin un gran responsabilidad. Un industria creciente no ta
contribui solamente na e crecemento economico, pero tin tambe implicacionnan social. Pa e motibo aki
ministerio y autoridadnan den sector turistico ta enfocando riba strategianan pa construi un habitat pa
felicidad. “Nos ta enfocando nos esfuerzonan den salvaguardia e calidad di bida di nos residentenan,
realzando oportunidadnan y capacidadnan pa biba e bida desea y mas importante ainda, laga nos
ciudadanonan ta miembronan orguyoso di e famia Arubiano”, Minister Oduber a indica. Pa logra e
ultimo ta usa hermentnan strategico manera ta e indice di felicidad cu ta midi e bienestar na nos isla.
Usando e herment aki por premira un rol importante pa YMCA como un di e mayor organizacionnan cu
ta enfoca riba comunidadnan local y progreso social.
Den su calidad di Minister di Cultura, el a bisa cu cultura ta un herment importante cu ta permiti cambio
y ta crea bienestar social. Educando nos ciudadanonan riba nan identidad, ta permitiendo nos hendenan
pa bira mas sigur y gara e oportunidadnan di crecemento. Den e cuadro aki, un parti esencial di e
esfuerzonan strategico ta riba educacion cultural pa nos hubentud y pa nos bishitantenan. Esaki ta
refleha e link cu Minister Oduber a haci entre turismo y cultura pa un crecemento sostenibel.
Contribui cu e bienestar social no ta bin sin responsabilidad. E impacto real ta wordo logra cu trabou
duro, un vision cla y enfoke riba calidad. “Mi ta kere cu ningun organizacion ta compronde esaki mihor
cu YMCA. Durante e siguiente dianan boso lo ta reflexionando riba solucionnan innovativo, maneho,
calidad y comunicacionnan. Cu e nivel di profesionalaismo aki mi ta kere cu e slogan di YMCA lo bay di
‘YMCA we want’ pa ‘YMCA we will’pa ‘YMCA we did and will continue doing so’”, Minister Otmar Oduber
a finaliza bisando.