Page 26 - awe1807

Dialuna18 di Juli 2022

FORTALEZA PA FAMIA

Skirbi pa Pastor Marcel Balootje.

NOS REGALO DI BIDA ETERNA JUAN 3 VERS 16.

Pasobra Dios a stima e mundo asina tanto, cu e a duna su yiu unigenito, pa ken cu kere den dj’E no bay perdi,
ma tin bida eterna. Dios ta stima nos tur igual, e ta stima henter mundo, pero e no ta stima nos pica, pasobra
pica ta separa nos for di Dios.( Ezekiel 33:11). Ta mescos cu bo tin un yiu cu ta droga, of den un bida inmoral,
of den baho mundo, den un palabra bisa bo ta stima bo yiu , pero su forma di biba ta separa bo for di dje,
pasobra ta imposibel comparti bida cune den e forma ey.

Ta pesey Dios a presenta nos su unico yiu Hesus Cristo , pa ken cu kere den dje no bay perdi, pero haña bida
eterna, pa medio di Cristo nos ta haña e oportunidad di arepenti y sali for di e bida malo, y biba den pas y
trankilidad. Nos mester corda cu e man di Señor no ta cortico pa salba y tampoco su horea no ta sordo cu E
no por tende .( Isaias 59:1-2). Dios a pone su condicion pa nos salbacion, cual ta: Cu nos mester kere den su
yiu Hesus Cristo. Pasobra e pago di pica ta morto, ma e don di gracia di Dios, ta bida eterno den Cristo Hesus
nos Señor.(Romanonan 6 :23).

Kico ta nifica bay perdi?
Esey ta nifica separacion eterno for di Dios, na e momento cu nos kere y acepta Cristo Hesus como nos Señor
y salbador nos bida eterno ta cuminsa y ora nos muri nos bida eterno ta continua den cielo serca Dios pa
semper.( Hechonan 16:30-31). Un hende cu muri sin kere y acepta Hesus Cristo como Señor y Salbador,e ta
pasa pa morto eterno den fierno.(Revelacion 20:15). Ta pesey Dios ta manda pa mayornan lanta nan yiunan
den caminda di Dios pasobra no tin otro caminda. Y ta un forma so tin pa bo scapa di dje, ta si bo entrega bo
bida Awe mes na Hesus, pasobra majan no ta primiti na ningun hende.

Ta solamente pa medio di e gracia di Dios, e misericordia no mereci, cu nos por tin bida eterna hunto cu
Cristo den cielo. Cristo Hesus ta e gracia, y ta pesey e palabra di Dios ta siña nos cu pa gracia nos ta salba.
(Efesionan 2 :8+9). Si bo confesa cu bo boca cu Hesus ta Señor,y kere den bo curazon cu Dios a lant’E for di
mortonan, lo bo ta salba, pasobra cu curason hende ta kere pa haña husticia , y cu boca e ta confesa pa haña
salbacion.( Romanonan 10:9+10). Tur hende tin e derechi di tin un relacion personal, cu Dios, mescos cu
nos ta prepara seguro di bida y kelder, nos tin di dicidi for di awor unda nos kier bay , sea pa bida eterna den
cielo of morto eterno den fierno. Si nos dicidi pa bida eterna den cielo, door di kere , confesa y acepta Cristo
Hesus como nos Señor y Salbador, nos lo sosega na paz, pero un persona cu muri sin Cristo lo no tin paz,
pasobra caminda e ta bay no tin paz. Un biaha mas nos kier mustra bon cla cu no ta trata di religion pasobra
religion no por salbabo ta si bo ta kere den Cristo manera Juan 3:16 ta bisa bo ta alcansa bida eterna. Dios ta
stima nos tur , E kier pa nos tur alcansa bida eterna.(2 Pedro 3 vers 9).

Sinceramente, Pastor Marcel Balootje.

26