Page 3 - flip minjus

14 AWEMainta Diabierna, 16 Januari 2015

Accion

Limpiesa y restablece orden
den cayanan di Oranjestad ta continua

AYERA mainta tempran e accion cu a cuminsa bao

guia di Minister Arthur Dowers den december aña
pasa a continua den cayanan di Oranjestad, bao
guia di un funcionario di Ministerio di Husticia.
E accion pasa den cayanan di Rancho hunto cu
Polis di Bario y personal di City Inspector, Serlimar,
Bureau Ondersteuning Verslavingszorg y FMAA.
Varios di e adictonan ambulante a solicita n’e
funcionarionan di FMAA y Bureau Ondersteuning
Verslavingszorg pa nan bay boluntariamente p’e
centronan di rehabilitacion. E adictonan ambulante
aki wordo hiba n’e respectivo centronan di
rehabilitacion.
Algun comerciante cu a tuma nota di e accion cu a
sigui den e area di Hotel Central tabata hopi positivo.
Mester remarca si cu den e area aki tin comerciante
cu no ta comportando nan mes como un bon bisiña.
A topa cu sushedad tira riba caya procedente di
pacusnan di caya grandi. E dia anterior algun di e
comerciantenan aki wordo verbalisa pa Polis di
Bario pa cu e acto aki.
Despues a sigui pa Santana Protestant den Caya
Ernesto Petronia. Aki tambe a topa cu adictonan
ambulante cu a haci e lugar aki manera nan “cas”.
Aki a lanta e adictonan y tuma tur nan
“pertenencianan” y a benta esakinan afo. A papia
cu e adictonan aki cu a bisa cu nan tambe ta fada
cu autoridadnan ta “molestia nan” y a dicidi di bay
boluntariamente pa rehabilita.
Por bisa cu e accionnan aki cu a cuminsa december
aña pasa bao guia di Minister Arthur Dowers ta
dunando nan fruto, ainda falta (hopi), pero mirando
e resultado positivo te cu awor, e accionan aki lo
continua pa trece ordo bek den Oranjestad.