Page 79 - KPA MAY 27,2015

Polisnan hayando training di E.H.B.O na
ImSan
Wednesday, 27 May 2015 09:19

Comparti

Recientemente a cuminsa e prome ciclo di EHBO training pa Polisnan trahando den e districto di San
Nicolas. E intencion ta pa henter e team sigui e curso aki na ImSan na San Nicolas.

District Chef di Warda di Polis di San Nicolas, Alvin Molina a splica cu e curso di EHBO ta inclui den e
opleiding di Polis, pero cada dos aña nan mester haci nan re certificacion pa ricibi nan carnet nobo. E
prome grupo di 25 persona a haci nan training y examen e siman aki y otro siman e di dos y ultimo grupo
di 25 persona lo sigui e mesun programa.

Inspector Molina a splica cu nan a acerca ImSan pa mira si e clinica lo por organisa y ehecuta e curso.
Tabata un grato sorpresa pa Polis ora cu ImSan a bisa cu no solamente nan kier ofrece Polis e curso, pero
cu nan lo regla pa Valero cubri e gastonan envolvi, cu ta inclui material pa les y otro detayenan.

Esaki ta un comienso y ta spera cu por sigui den futuro cu e curso importante aki, tambe pa otro
districtonan. Ambulance y Cruz Cora ta e profesionalnan den e area di brinda cuido medico riba caya,
pero como cu hopi biaha Polis ta e prome pa yega na un accidente of otro incidente, nan mester ta capaz
pa ofrece e pashent ayudo mesora. Esun cu duna e ayudo mester ta entrena tambe.

E intencion ta pa tur Polis sigui e curso aki y mester ripiti’e cada dos aña. Un training di EHBO (Eerste
Hulp bij Ongelukken) of “Prome Auxilio” ta esencial pa Polis, pero en realidad bon pa tur hende tin,
pasobra bo no sa nunca na ki momento bo tin mester di dje pa duna asistencia sea na trabao, riba
caminda of na cas.

Cuerpo Policial Aruba ta existi desde aña 1986 y ta conta awendia cu mas o menos 600 Polis trahando
incansablemente pa brinda siguridad na nos pueblo. Ta trata aki di 375 hende homber, 104 hende muhe y
120 empleado administrativo, trahando den 4 districto, cu Warda nan di Polis situa na Oranjestad, San
Nicolas, Noord y Santa Cruz.

Orguyosamente Cuerpo Policial Aruba ta conta cu hopi respet internacional, specialmente pa su
unidadnan special manera “Motor Unit”, “K9 Unit”, “Arrestatie Team”, “Mobiele Eenheid”, “Duik Team” y
“Helicopter Unit”, sin lubida e departamentonan conoci di patruya y recherche cu ta bon entrena y capaz
pa investiga y soluciona e casonan mas complica.

Cuerpo Policial Aruba ta traha den cooperacion estrecho cu Cuerponan di Polis den Reino Hulandes
manera Korps Politie Rotterdam Rijnmond, KLPD y RST, sin lubida otro partnernan internacional
manera Interpol, DEA, FBI, RCMP, Force Protection Agency, ACCP y IACP. Pa mas informacion por subi
e website www.kparuba.com of “like” nos Facebook riba https://www.facebook.com/korpspolitiearuba.