Page 29 - DIARIO

DIAMARS 28 JULI 2015 DIARIO
Skirbi un columna pero sin perde cabes ta mas facil cu bo ta kere
Mi tabata den supermercado y e cliente a puntrami: “Kico bo ta bin
cune dialuna?”
Pa bisa berdad, mi nunca sa kico mi ta bin cune. Mi por skirbi algo
awe, mañan y otro mañan y por dura un siman of mas, prome cu por
lesa algo di mi atrobe.
Pa colmo ningun ta mescos of tin mes estilo, pasobra mi no sa kico
esey ta. Ta depende na mi beis, mi religion, mi dia, mi ora di skirbi
etc. Topico nunca mi tin.
Mi a contesta e cliente cu mi tin cu check mi inbox di e-mail pasobra
e ta yen sigur y ta masha poco mi ta habri e-mail, pasobra e ta
mucho yen y ta tuma mucho tempo pa sinta lesa y contesta.
Mi no sa con e hendenan a haya sa kico mi e-mail ta tampoco. Mi
ta masha bobo den asuntonan tecnico di medio “sabi’ di e tempo
moderno aki. “Smart esaki of Smart esaya”.
DIASABRA MAINTA
Mi a lanta mainta cu intencion di skirbi un columna y a bay traha un
copi cofi pasobra mi no por skirbi sin tin algo di bebe den cercania
mainta tempran. Pero ta depende na mi beis tambe. Si mi ta di mal
beis, lubida!
Mi a laga para y dicidi di skirbi mas laat den dia. Mi lo bay
Supermercado prome, kizas mi haya inspiracion pa un topico.
Inspiracion mi a haya sigur. Esey tabata e pregunta: “Kico bo ta bin
cune dialuna?”
Atami na cas merdia ta bahando mi cuminda y pensando pa cuminza
skirbi. Mi tabata hopi ocupa mainta caba di a traha asina tanto, cu mi
a haci nada. Ademas, mi cellular tabata zona constante tras di otro.
Mi inbox di computer mester ta yen di e-mail. Mihor mi controla esey
awor y skirbi despues.
Pa siet’ or anochi ainda mi no a skirbi nada.
DIASABRA ANOCHI
Lagami prepara algo pa come prome y despues lo tin hopi tempo pa
skirbi. Mi a come mientras mi tabata gosa di Weganan Panamericano
y cricket na television y a corda cu mi a keda di skirbi.
Prome cu esey, mi a drenta cushina pa warda locual mi tabata tin riba
mesa. Ta e ora ey mi a ripara cu mi cushina tabata ariba abao. Man
na obra!
Despues di un mey ora tur cos tabata lombra limpi limpi ( pa mi gaña
poco) y mi a cay sinta tras di mi laptop.
Mi tabata sintimi cansa. Mi no por skirbi ora mi ta cansa. Peor ainda
ora mi ta mentalmente cansa. Mi cabes lo dal abao riba e teclado y lo
mi ta skirbiendo na soño. M’a laga tur cos para pa e dia siguiente.
DIADOMINGO
Su manise mi a lanta cu hopi smaak pa skirbi, pero prome cu esey,
lagami mira kico tin di noticia.
Television a informami di horcan, volcan, temblor, tsunami,
desaster natural aki y aya, atakenan di I.S. y contra I.S.,
terorismo y asina mi por sigui. Mi a dicidi di no skirbi. Mi no por skirbi mi cabes un dia. Un caminda ey fo tin un cabes y si bo haye, por
ora cu mundo ta na punto di yega su fin.
Mi a dicidi di bay traha y lo traha riba e columna despues.
Diadomingo el a keda na un deseo un biaha mas. Mi a skirbi tocante
otro cos y no un columna.
Anochi na cas mi a dicidi di purba pensa riba un topico, pero tabata
parce cu riba diadomingo topiconan ta sosega.
Mi a duna mi computer un bishita un biaha mas y keda cu bista riba e
pantaya bashi.
Television tabata paga, mi cellular tabata recarga y mi inbox di e-mail
tabata bashi “atrobe”. Atami sinta pensando pa cuminza skirbi y no
PAGINA 29
por corda mas kico tabata e topico riba cual mi kier a skirbi.
Pesey esaki ta bin awe prome cu mi perde cabes.
DIALUNA
Kico lo bo haci si bo perde bo cabes? Kico lo bo haci si bo ta
buscando bo cabes y no ta corda unda bo a lagu’e. Si bo por corda,
kizas bo por hay’e.
Mi cabes por ta lorando un caminda den cas, sperando pa mi calma
of te ora mi pensa normal atrobe?
Tempo mi tabata mucha, mi tata semper a laga sa cu cada riesgo
cu mi a tuma, cu mi lo a perde mi cabes si e no tabata asina bon
pega. Mi ta kere awe cu e tabata tin tur razon di mundo. Kico lo mi
haci si mi no tin cabes? Kizas drenta den panico.
Buscando aki, aya, eynan, tur caminda, y ningun cabez. Kico lo mi
haci sin cabes? Imposibel! Con bo por perde bo cabes?
E unico bon di un banda tabata, cu no tin dianan malo mas, ni cu
papiamento di mas. Lo no tin dolor di diente mas, ni dolor di cabes.
Ningun lagrima of niestermento. No mester di pechi of sombre, ni
estilo di pela of peña. nada mas di soña ni di hari.
Mi tin gana di bebe un copi cofi pero con mi por haci esey sin
cabes?
Kico ta causa cu hende ta perde nan cabes ?
Mi a tende di hende, cu ta perde cabes ora relacion amoroso termina.
Pero mi bida ta e mes bida bieu. Nada nobo pa bisa cu mi lo perde mi
cabes pa esey.
Si mi tabata tin mitar cerebro, mi lo a corda sigur kico mi a haci cu
mi cabes.
Mi sa cu ayera mi tabata tin e ainda. Mi tabata tin e ora mi a bay
drumi sin a skirbi mi columna?
Mi por a lagu’e riba cusinchi of mi ta djis soña cu mi a perde mi
cabes?
Straño no! Ora bo perde bo cabes bo no por corda nada.
Mi por a pon’e un caminda y lubida di piki’e bek.
Con un hende por lubida algo asina importante manera su
cabes? Esaki ta mas critico cu perdemento di bo yab’i auto of perde
bo cellular.
Mi por a lagu’e den auto. Mi por a pone den mi cartera? E por ta den
baki di paña sushi pa laba of den baki di sushi pafo sperando
riba yegada di truck di Serlimar?
E unico cos bon awe ta cu mi no a haya dolor di cabes. Kizas mi a
haya migraine y a desea pa mi cabes por a desaparece. Pero mi no
ta kere asina. Hecho ta cu mi no por pensa sin mi cabes.
Mi cabez! Mi no por sali sin mi cabes. Kico mi bisiñanan lo bisa?
Nan lo yama polis y bisa cu tin un hende sin cabes den vecindario?
Ta contra ley si bo ta sin cabes?
Mi por bay traha sin cabes.
Hasta si mi por usa mi computer mi no por papia na telefon.
Mi nunca a sinta pensa riba e importancia di tin un cabes. Nos
tabata hunto asina hopi decada cu mi nunca a kere cu mi lo perde
fabor trece bek pa su doño. Mi tin miedo di mira den spiel y ripara
cu mi no tin cabes. Mi lo purba toch pa sa con mi lo parce sin cabes.
Heeeyyy ! Ata mi cabes ta na su lugar. Mey mey di mi
schoudernan, entre mi oreanan, exactamente unda semper e tabata.
Tur mi preocupacion tabata por nada.
Semper mi a tende cu lo tin dianan asina. Busca prome, drenta
panico despues... y trata pa no perde bo cabes.
Awor mi por skirbi un columna tocante e dificil cu ta pa haya topico y
pa no perde cabes.
Juby Naar.