Page 47 - Extra

Djabièrnè 19 Febrüari 2016 47

...Estudio nobo
ta revelá...

BEBEMENTU DI KOFI
POR REDUSI DAÑO NA
HIGRA PA MOTIBU DI

ALKOHOL

WILLEMSTAD.- Un
estudio nobo publiká e
siman aki a konkluí ku
bebementu di kòfi por
redusí e impakto riba higra
pa motibu di bebementu di
alkohòl. Problema di higra
ta un di e síntomanan mas
serio na Kòrsou i poko
komentá. Bèrgwensa ta
hunga un ròl komo ku
hende no kier atmití ku
nan ta bebe eksesivamente.

E estudio ingles a
determiná ku bebementu
di dos kòpi kòfi pa dia por
kontrarestá pa gran parti
e efekto di bebementu di
mas. Bebementu eksesivo
tin un impakto serio riba
higra ku ta kondusí na
loke ta yama “cirrhosis”.
A publiká e resultadonan
den e revista speshalisá,
Alimentary Pharmacology
and Therapeutics.

E revista ta bisa ku ora
un hende bebe dos kòpi
kòfi pa dia, esei ta kòrta e
riesgo di cirrhosis di e higra
ku 44 porshento. A yega n’e
konklushon aki despues di
9 estudio di tèrmino largu,
enbolbiendo mas ku mei
mion hòmber i muhé den
6 pais. Sientífikonan di
University of Southampton
na Gram Bretaña a revisá
e estudio. Nan a konkluí
ku si bebe dos kòpi kòfi
pa dia un hende ta kore
ménos peliger di sufri di un
cirrhosis di higra òf di muri
di bebementu di alkohòl.
Opviamente ku e resultado
no ta nifiká ku hende por
bai bebe pa loko numa i
despues bebe dos kòpi kòfi.

Ora un hende tin
cirrhosis di higra, e higra
no por atendé mas ku e
efektonan di tèrmino largu
di alkohòl òf hepatitis B. E
kondishon aki por kondusí
na fayo di e higra i hasta
kanser di higra. Tin mas
ku un mion hende ta muri
mundialmente pa aña pa e
kondishon aki.

E sientífikonan a bisa
ku e bebementu di kòfi tin
un impakto mas grandi
ku uso di remedi. Mester
tene kuenta ku remedinan
semper tin efektonan
sekundario tambe pero
kòfi ta un kos ku e kurpa
ta tolerá hopi bon.

No ta promé biaha ta
menshoná e benefisio di
kòfi.