Page 14 - BRANDWEER OCT 30, 2015

Palapanan na Renaissance Island a pega candela

Publication: Friday, 30 October 2015. Categoria: Policial

ORANJESTAD (AAN) – Diahuebs mainta a habri cu un candela inusual, riba Renaissance
Island. Den oranan tempran di mainta a mira huma ta bay halto.

Un di e personanan cu a atende cu e candela aki tabata Ferdinando Ponson, Officier na Cuerpo di
Bombero.
Tabata rond di 7.37 cu e meldingnan a cuminsa drenta cu tin un candela riba Renaissance Island,
mirando e huma grandi cu por worde mira for di costa.

Pero pa Bomberonan e situacion tabata un poco diferente ya cu e candela tabata riba un isla
apart. Mesora a drenta den contacto cu ehecutivonan di Renaissance, Maritiem Politie,
Kustwacht y APA. Y asina via di e shuttle di Renaissance den mas o menos 17 minuut e
bomberonan a logra yega e isla pa mira con nan por atende cu e candela.
Na yegada di bomberonan a constata cu tabata e palapanan banda di e bar tabata completamente
na candela. Tabatin un grupo chikito di empleado trahando caba cu tabata haciendo tur lo posibel
pa paga e candela.

Bomberonan tabatin un trabao dificil pasobra mester a spera cu e supherip di Guardacosta yega
cu material pa uza den combatimento di candela. Nan preocupacion grandi tabata un tanki grandi
di gas y e Bomberonan a haci uzo di pomp chikito pa muha e tanki di gas pa evita cu tin un
explosion riba e isla.

Segun Ponson, esaki tabata un bon momento pa e trainingnnan cu nan a bin ta haciendo pa tipo
di candelanan asina cu ta riba un di e islanan separa.
Kico ta causa di e candela no ta conoci, pero ta bou investigacion di departamento di TOD di
Polis.

Por bisa cu un parti di e isla a keda habri y uzable y turistanan den oranan di merdia a worde
transporta normal pa e isla y disfruta di loke nan tin di ofrece.