Page 20 - ATA JAN 20,2015 revised

16 AWEMainta Diamars, 20 Januari 2015

“Hulanda ta sostene Aruba

den su desaroyonan riba tereno di Pre-Clearance”

DIABIERNA siman pasa Comandante di Marechausse drs.Hans Leijtens

tabatin un encuentro cu Prome Minister di Aruba, Mike Eman.
E bishita tabata enfoca riba vigilancia di frontera y e deseo di Aruba pa
introduci na Aeropuerto un Pre-Clearance pa Europa. Un concepto cu for
di un inicio Prome Minister a pidi atencion p’e na Den Haag. Mientrastanto
masha hopi esfuerso a wordo haci riba e tereno aki y e avancenan ta bisto.
Na su salida di oficina di Prome Minister Eman, Hans Leijtens a splica cu
un bes pa aña e ta bishita tur su unidadnan den e region Caribense.
“Mi ta trata mas tanto posibel di bishita tur isla y tur tres pais. Mi ta papia
cu mi coleganan militar y na mes momento mi ta tuma e oportunidad pa
papia cu e autoridadnan concerni. Cu Eman mi a papia riba vigilancia di
frontera na Aruba y e desaroyonan den e futuro cercano. Den e mesun
contexto ey nos a papia tambe riba Pre-Clearance cu tin tur atencion di
Hulanda.”Pa loke t’e topico Pre-Clearance, drs. Hans Leijtens a bisa cu a
keda palabra cu Hulanda ta bay sostene Aruba den e desaroyonan riba e
tereno aki.
“Hunto cu Aruba nos a wak aña pasa riba e situacion actual, entro otro con
cosnan ta canando awor y si nan por sigui den e Pre-Clearance. Tambe
nos a acorda cu nos ta bay yuda Aruba cu 6 miembro di personal cu ta bay
yuda pais Aruba pa optimalisa mas ainda e vigilancia di frontera.” Tur
esaki pa duna aporte n’e concepto Pre-Clearance.