Page 6 - MARRIOT APRIL 14,2015
P. 6
Erwin Noguera ta e “Top Performer of The Year” pa
Marriott Vacation Club International
Apr 13th, 2015
Local
Un dia prome cu su vakantie cuminsa, un colega di e General Manager di Marriott Ocean Club
Aruba, Erwin Noguera, a yam’e pa e yega hotel urgente pasobra tubo di awa a kibra den
Champions y cu e restaurant tabata bou di awa. Noguera, como un ex-director di engineering cu
hopi experiencia a pensa caba cu su dia trankilo no ta un realidad mas y e mester pospone su
vakantie. E tabata asina enfoca riba e problema cu el a cana drenta via di e cushina, cu su mente
ful riba e plan pa resolv’e, memey den un sorpresa na su honor.
Asina a cuminsa e celebracion di entrega di e reconocemento na Erwin Noguera como “Top
Performer of The Year” entre tur General Manager nan di e region di Florida y Caribe pa
Marriott Vacation Club International (MVCI). Erwin Noguera ta e prome General Manager
Arubano di e producto MVCI di Marriott. E tin menos di dos aña den e funcion aki y loke a
sorprende ehecutivonan halto den e compania ta cu Noguera a ricibi den un solo aña (2014) 24
mencion di huespednan riba e encuesta cu nan ta yena durante of despues di nan estadia.
Erwin Noguera a cuminsa traha den e funcion di General Manager na augustus 2013 y aña 2014
tabata su prome aña completo como General Manager. E ta splica cu e ta compronde di hefenan
di e oficina principal di Merca cu e miho General Managernan ta logra 50 pa 54 mencion pa aña
y tabata impresionante pa mira un General Manager nobo cu tanto mencion caba.
Noguera a bisa cu loke a sosode aki tin tur cos di haber cu con e ta involucra su mes cu e
huespednan, esta e doñonan di timeshare. E tin e custumber di cana rond di pool, combersa cu e
huespednan y berdaderamente scucha nan. Un otro caracteristica di su estilo di maneho ta cu ora
tin un reto, e ta sali pafo, e ta topa e huesped cu un saludo y semper ta puntra “con nos por
resolve esaki”.
E Gerente General a elabora tocante e importancia di corda un persona su nomber. Si hende
corda bo nomber ta pasobra e ta importante p’e. Noguera a bisa cu e ta haci su esfuerso pa corda
e nomber di su huespednan. Esaki ta un refleho di un interes genuino den e huesped y ta trece
cune un bon impresion.
“E hecho cu nos tin doño ta bin bek hopi na Aruba tin di haber cu nos, cu bo persona, cu mi
persona, pasobra nos como Rubiano di naturalesa nos ta bon hende, e ta den nos. Nos tin e
bendicion ey,” Erwin Noguera a subraya.