Page 8 - MIN JUS

2 AWEMainta Diasabra, 14 October 2017

PA DI TRES

BIAHA CASO

ASESINATO

DI WAYACA

POSPONI

UN biaha mas e caso di asesinato na Wayaca, den
cual tin dos acusado, a keda posponi. Esaki ta di tres
biaha cu e caso ta bin dilanti y no ta wordo trata.
E prome biaha e acusadonan a bin Corte den luna di
april y juni, y mester a pospone e caso pa motibo cu
documentonan relaciona cu e caso, y informacionnan
importante cu no tabata cla ainda.
E biaha aki e motibo tabata cu un di e acusadonan,
Po. S.F., tin un asunto administrativo cu e mester
regla cu su abogado di Hulanda mr. Spong.

Como cu e mes ta sera, el a splica, ta su famia por regla
e problema administrativo aki, “pero nan ta kedando
cla”, el a splica Huez diabierna mainta.
Aunke e otro acusado, Jefferson P.E., a bay di acuerdo
pa pospone e tratamento un biaha mas, el a pidi pa
riba e siguiente fecha si e kier p’e caso wordo trata,
segun su abogado mr. Carlo.

E acusado Po S.F., ta calcula cu den mas o menos
dos siman di tempo lo por yega na un solucion cu su
abogado, pa cual Huez a dicidi di pone e tratamento
di e caso pa dia 7 di december, pa 8.30 di mainta.
Presente den e sala tabatin un cantidad di famia di e
victima, pero tambe di e acusado aki.

Yiu muher di e victima a mustra Huez documentonan
cu ta mustra cu nan, dos yiu y esposo di e victima,
haci un demanda contra e acusadonan. Pero tambe un
carta cu nan kier pa wordo lesa durante tratamento
di e caso, pues dia 7 di december awor.
E. y F. ta wordo acusa cu conhuntamente cu un
otro of otronan, a kita bida di un persona riba 13
di september 2016, dor di los un of mas tiro riba e
victima femenino, a consecuencia di cual el a fayece,
pero tambe nan ta wordo acusa subsidiariamente
di ladronicia cu violencia di un suma di placa y un
cadena y telefonnan y un auto.

E ultimo biaha, e caso a wordo posponi riba peticion
di Fiscal, pa haci investigacion riba e rutanan cu e
sospechosonan por a tuma, y tambe tocante e yama-
danan cu nan a haci durante e dia aki.
E caso aki ta unda cu un comerciante Chines fe-
menino supuestamente a bira victima di atraco cu a
resulta fatal.