Page 2 - AWM 20JUNE2018

2 AWEMainta Diaranson, 20 Juni 2018

Alumno femenino na E.P.B. San Nicolas ta bira hopi

agresivo despues di a bebe algo for di un otro alumno

E.P.B. San nicolas: Diamars algo pasa di 9 ‘or
y mey di mainta. Presencia di polis y ambulance
ta wordo pidi cu urgencia na E.P.B. San nicolas,
pa un alumna cu despues di a bebe algo a bira
hopi agresivo.
Na yegada enberdad nan ta bin compronde cu
aparentemente un damita tabata sinta cu su ex
pareha, kende tambe ta un alumno di E.P.B.
su ex lo tabata tin algo di bebe den su man y
aparentemente e damita lo a bebe for di dje.
Despues cu e damita a bebe esaki, ela bira hopi
agresivo.
Segun polisnan na e sitio, e scol aparentemente
no lo kier a coopera cu polis y probablemente lo
tabata haciendo nan mesun investigacion.
Na yegada di polis ya e mucha homber (ex di e
damita) a bay for di e scol y ela bay tambe cu e
botter, bleki, etc. den cual tabata tin e bebida. E
damita tampoco no kier a coopera cu polis.
E mama di e damita tambe a presenta na scol y a
bisa polis cu su yiu no ta un mucha problematico.
Personal di ambulance despues di a trata e damita
na scol, a transporte cu urgencia pa hospital. Na
hospital nan lo haci algun test cu e damita pa
haya sa kico e damita lo a ingeri. No ta descarta
e posibilidad cu loke e damita a ingeri, despues
di un rato lo por tin side effectsnan serio y p’esey
no a duda y a transporte cu urgencia pa hospital.
E damita y su ex ambos ta menor di edad, e caso
aki lo ta den man di recherche di San Nicolas y
tambe mirando nan edad JZP lo haya tur datos
pa haci mas investigacion si ta trata di un caso
den cual e Ex a intoxica e damita of ta e mes a
bebe esaki conscientemente.

Merca a ‘Recall’ Kellog’s Honey Smack cereal

Parce e no ta obtenibel localmente

Centro di Control di malesa i prevencion (CDC) na Merca a saca un informe tocante
productonan di Kellog’s cu posiblemente ta contamina cu Salmonella.
Ta trata di tur producto ‘Kellog’s Honey Smacks cereal’, sin importa e fecha di
vencemento. Pero principalmente mester tene cuenta cu esnan cu ta caduca entre 14
juni 2018 pa 14 juni 2019.
Na Merca nan a adverti e consumidornan pa come e cereal aki pasobra e ta vincula
cu un brote di infeccionnan di Salmonella cu a haci 73 persona den diferente estado
malo. E compania Kellogg mesora a retira for di mercado e cahanan di cereal Honey
Smacks di 15.3 onz y 23 onz y a cuminsa un investigacion riba e brote di Salmonella
cu e fabricante externo cu ta produci e cereal, pa haya sa origen di e infeccion.
Di e 73 personanan cu a bira malo, 24 mester a wordo interna. Durante e investigacion,
14 di e personanan a bisa cu nan a come Honey Smacks di kellogg’s prome cu nan a
bira malo.
Nan ta menciona cu e producto aki ta wordo distribui entre otro den Caribe. Aki
na Aruba sinembargo no a menciona nada, esta si e producto aki ta wordo bendi
localmente.