Page 4 - MEZA

Aeropuerto di Aruba y Avianca a celebra mas vuelo y opcion aereo

Published on April 26, 2017 in Social

ORANJESTAD, Aruba

E aerolinea ta existi desde 92 aña pasa y pa hopi aña consecutivo ta mantene un relacion estrecho y sin
interupcion cu Aruba. Diamars mainta, den VIP Room di Aeropuerto International Reina Beatrix a
celebra e hecho cu desde april 2017 e aerolinea a aumente su frecuencia di vuelonan di 7 pa siman pa
11 pa siman! Jo-Anne Arends, como Air Service Development Manager di Aruba Airport Authority N.V. a
sinta hunto cu Johanna Hernandez, Commercial Executive di Avianca Aruba, pa hunto anuncia e
vuelonan adicional.

E vuelo nobo ta sali tur diabierna, diasabra, diadomingo y dialuna pa 7:57am for di Bogota y yega Aruba
pa 10:53am y sali bek 12:24am y yega Bogota pa 1:15pm. Lo bula entre otro cu avionnan modelo Airbus
319 cu tin mas stoel disponibel pa nos destinacion, na tur mas cu 6000 stoel pa luna. Avianca ta bula cu
no menos di 177 avion pa 104 destinacion den 28 pais. Nan tin un total di 22.000 empleado y nan
hubnan principal ta Bogota, San Salvador y Lima. Nan programa di biaheronan frecuente “LifeMiles” ta
conta cu no menos di 6 miyon miembro rond mundo.

Durante e conferencia di prensa a subraya e hecho cu Aruba ta e unico pais na mundo, pafo di Colombia,
unda Avianca tin un “call center”, na papiamento, pa atende cu pasaheronan riba benta di pasashi,
reservacion, cambio di pasashi, etc. E aerolinea tin dos punto di benta, un na Eagle y otro na Aeropuerto
mes. Cu e adkisicion aki lo engrandece e ruta di Avianca cu opcion pa no solamente bay Bogota, pero
tambe otro destinacionnan domestico den Colombia manera Cali, Medellin y Pereira. Tambe pa
mercadonan existente pa Aruba manera Argentina, Brazil y Chile, pero tambe awor ta brinda
oportunidad pa explora mercadonan nobo den Sur America manera Costa Rica, San Salvador y Uruguay.