Page 12 - DIARIO 15AUG,2015
P. 12
PAGINA 12 DIARIO DIASABRA 15 AUGUSTUS 2015
Damnan no lo bira seco!
Proyecto di balanan implementa na Los Angeles lo
por ta di ayudo na Aruba den temporada di secura
ORANJESTAD (AAN):
Aruba a confronta un periodo
di secura hopi extenso.
Practicamente no tabata tin
awacero y esaki a causa cu nos
damnan a seca completamente.
Den e dianan aki por ripara
den media internacional cu na
Los Angeles, California, a cubri
cu balanan di plastic preto un di
e damnan di awa potabel di e
ciudad.
Pakico nan a haci esaki? Ta
trata di un proyecto interesante,
no un experimento atravez di
cual nan kier mehora e calidad
di e awa cu e ciudadanonan ta
consumi y na mesun momento
evita cu e awa ta evapora den
un momento di secura.
Nan a hinca 96 miyon bala
“shade balls” di un diametro
di dies centimeter cu ta cubri
70 hectarea di e asina yama
dam di Los Ángeles, na e bario
di Sylmar na San Fernando
Valley.
Cu un prijs di US$0,36 pa
bala, e proyecto a costa rond di
US$34 miyon.
E balanan aki ta blokea e luz
di solo, evitando e aparicion di
alga (seaweed). Ora cu e awa ta
sali for di e dam e ta pasa atravez
di un planta di tratamento
cu rayonan ultravioleta cu ta
elimina e germennan”.
Ademas di mehora e
calidad di e awa, e balanan tin
e beneficio adicional di spaar
miyonnan di galon di awa cu di
otro manera lo evapora.
Esaki sigur ta un bon
iniciativa pa Gobierno cuminza
tene cuenta cune. Na Aruba tin
algun dam cu den temporada
di secura ta bira seco seco. Por
ta si ta inverti den un proyecto
asina, esaki lo yuda na tene un
reserva di awa pa ora no tin
nada di awacero pa asina yuda
e cunukeronan.
Si ta pasa den e dianan aki
banda di e damnan cu tin rond
di Aruba por ripara cu nan
ta seco. Lo ta bon pa Santa
Rosa check e viabilidad di
un proyecto asina pa Aruba y
asina evita cu e damnan muri
locual no ta afecta solamente
nos cunukeronan pero tambe
nos flora y nos fauna.
