Page 26 - UTILITIES

“Nos ta sumamente contento cu e desaroyo aki. Nos ta premira cu mas o menos pa fin di
aña lo Bo por mira un mil hende trahando caba den e refineria. Awor aki caba tin 400
trahado caba na pia di trabou den e prome fase di e rehabilitacion”, segun Minister Mike
de Meza.

E mandatario ta premira cu pa otro aña, e cantidad di trahadornan lo subi te na entre 1500
pa 2000 persona.

“Di acuerdo cu e proyeccionnan, ta premira cu na final di aña 2018 caba e contratistanan
lo mester ta cla cu e diferente proyecto p’asina cuminsa startup e prome mitar di e
refineria cu ta 125 mil bari pa dia. Y su tras lo start e di dos parti di e proyecto pa na final
produci 210 mil bari pa dia. E lo ta mes grandi cu tempo di refineria Valero”, di acuerdo
cu Minister de Meza.

E mandatario, kende riba su mes ta un experto riba tereno petrolero a conta cu ta depende
con bon e refineria ta progresa y ta responde riba e cambionan y rehabilitacion, cu den
futuro lo por sigui expande y alcansa 350 mil bari di producto petrolero pa dia!

“E t’asina cu ora bo tin un refineria di 125 mil bari pa dia, cu ya bo ta papiando di un
refineria grandi caba. Tempo di Lago esaki tabata core entre 400 pa 450 mil bari pa dia.
Corda cu cierto momento Lago tabata e refineria mas grandi na mundo.

Awendia lo oper’e mescos cu tempo di Valero cu e diferencia cu e productonan lo wordo
uza pa produci un crudo superior cu lo wordo bendi riba mercado internacional”, asina
Minister Mike de Meza a termina splicando.

http://awemainta.com/minister-mike-de-meza-a-confirma-placa-pa-rehabilita-citgo-
aruba-ta-aproba-caba/