Page 16 - Minister Paul Croes April 2,2015

COA ta felicita atletanan cu nan premio como
Atleta di Aña den Premio Excelencia den Deporte
2014

· Apr 1st, 2015
· Deporte

Diabierna ultimo durante di un anochi di gala a tuma luga e prestigioso evento Premio Excelencia den
Deporte 2014. Pa mas di un decada, e evento di gala aki, organisa pa Ministerio di Deporte y Gobierno di
Aruba ta sirbi como un muestra di gratitud, reconocimento, y estimulo cu ta duna na esnan cu a destaca
den mundo di deporte. Den e caso specifico aki, e federacion deportivo ta nomina su miho atletanan, y ta
obvio cu e atleta aki no solamente a logra triunfa durante cada competencia pero tambe ta un ehempel
pa otro atletanan, cua disciplina, motivacion, determinacion, etc. Manera tur aña, varios atleta cu ta
competi bou di e constelacion Olimpico tabata nomina den un of mas categoria. Mester bisa cu COA ta
sumamente orguyoso cu Kamilah Dammers, Renze Postma y Kyra Hoevertsz a keda eligi como Atleta di
Aña den nan respectivo categoria. E atleta di landamento sincronisa, Kyra Hoevertsz a logra e titulo
como Atleta di Aña den e categoria hubenil femenino 14 – 18 aña, mientras Renze Postma a logra triunfa
den dos categoria esta Atleta di Aña den hubenil masculino 14 – 18 aña como tambe e titulo como Atleta
di Aña Local 2014. Como Ekipo di Aña 2014 a keda e bolicheranan Thashaina Seraus y Kamilah
Dammers, esaki pa nan logronan impresionante den 2014. Na final di e anochi, e bolichera Kamilah
Dammers a keda eligi como Aruba su Atleta di Aña Internacional 2014. Nos tur por corda con aña pasa
durante di e Weganan Centro Americano y del Caribe, e hoben Dammers a haci historia pa Aruba na
Veracruz, Mexico door di logro obtene un medaya di oro y un otro medaya di plata den bowling, kibrando
mas cu ocho record Centroamericano.
Na banda di tur esnan cu a cay den premiacion tabata tin otro atletanan cu tambe a keda nomina e
anochi aki. E atletanan Daniella van den Berg di landamento, Yannick Roos di bowling, Zaithyel
Soekandar di BMX y Mack van den Eerenbeemt di sailing a keda nomina pa e premio atleta di aña den e
categoria hubenil 14 – 18 anja, mientras e atletanan femenino, Jeadine Luidens di bowling y Monica
Pimentel di taekwondo a keda nomina pa e premio Prospecto Deportivo 2014. E atletanan Philipine van
Aanholt, medayista di oro den e Weganan CAC, Anouk Eman medayista di brons den e Weganan CAC,
Stuart Smit, medayista di brons den e Weganan ODESUR, Jennifer Piter, Jordy Groters y Quincy Breell
tabata nomina den e categoria pa e premio Atleta di Aña Internacional. Tambe nos a haya Amanda
Maduro di landamento sincronisa y Jayme Mata di judo y alabes atleta Olimpico di London 2012 a keda
nomina pa e premio Atleta di Aña Local, mientras e seleccion di landamento sincronisa a keda nomina
den e categoria como Ekipo di Aña 2014.
COA sigur ta masha orguyoso di tur e atletanan cu a keda nomina na e anochi di Premio Excelencia den
Deporte 2014. Un palabra di pabien na cada atleta, entrenador, dirigente, e federacion deportivo y
mayornan cu ta contribui na e exito aki.