Page 7 - AAA

Aruba Airlines a efectua buelo
‘inaugural’ pa Corsou oficialmente

Posted on 11/14/2017 3:44 pm AST | Updated on 11/14/2017 5:56 pm AST

WILLEMSTAD/ORANJESTAD – Aruba Airlines a efectua su buelo inaugural
oficialmente riba e ruta Aruba-Curacao-Aruba cu nan avion nobo bombardier
pinta na color di e aeroliña. Aunke a cuminsa algun siman pasa caba, awor cu tin un
avion cu tin e colornan di e aeroliña, a haci un ‘press trip’. Na Corsou, e gerencia
den persona di Estevan Valles (CEO) y Frank Arendsz (Accountable manager) a
tene nan conferencia di prensa. Aki a splica e.o. cu no ta prome biaha cu nan a bula
pa Corsou y Bonaire. Solamente cu den pasado a haci esaki cu un avion cu no a
resulta mucho rendabel (avion mucho grandi). A dicidi di para esaki pa motibo di
compromiso entre otro cu e buelo entre Miami y Cuba cu p.e. 32 buelo semanal.

CORSOU Y BONAIRE

A cuminsa planea e buelonan atrobe, pero cu avion di diferente estilo commuter. A dicidi
pa bula cu Dash, y despues cu e CRJ (e bombardier). Despues di un estudio, a bin scoge e
CRJ 200 long-range, (bombardier) cu cual a cuminsa bula luna pasa. For di ayera e avion
cu e colornan di e aeroliña a yega for di Ft Lauderdale y lo pone den operacion entrante
diaranson publicamente.

SCHEDULE

Tabatin hopi interes y confiansa den e pueblo di Corsou, pa cu e aerolinea, cu a dicidi di
cuminsa bula un di tres buelo tur diamars diaranson y diadomingo. Tur esaki debi na e
confiansa cu e pueblonan ABC a duna e aerolinea, segun Arendsz a splica durante e
conferencia di prensa na Corsou.

TEMPO

E tempo di buelo entre Aruba y Corsou ta apenas 18 minuut, cu ta sigur un record segun
Arendsz. E reservacionnan ta bayendo hopi bon y tin un promedio di 80% di reservacion
cu pa e aerolinea, cual ta hopi bon mes. E buelo ‘inicial’ tabatin 38 pasahero cu ta
consisti grandemente di e miembronan di prensa.

BONAIRE

Dia 30 di november ta cuminsa bula pa Bonaire. Bookings ta bendiendo hopi bon segun
Arendsz tanto for di Bonaire pa Aruba y visa versa. “Nos ta spera cu e bira un exito
rotundo” Arendsz a sigui bisa.