Page 14 - KPA 1 DEC 2015

Otty Maduro a fayece dialuna mainta despues cu el a bira
malo y a stop di hala rosea pa mey ora largo

Publication: Tuesday, 1 December 2015. Categoria: General

Esfuerso di Paramediconan tabata en vano

ORANJESTAD (AAN) – E noticia exclusivo cu Diario a bini cune den su edicion di ayera
encuanto un homber cu no tabata duna señal di bida, a haya confirmacion cu el a fayece dialuna
den oranan di mainta.

Segun informacion no oficial ricibi ta indica cu despues cu paramediconan a traha hopi duro riba
dje na e sitio unda cu el a wordo haya tira na suela, sin señal di bida, a logra haya un pulso debil
pa cual a dicidi di pone den ambulance y hibe hospital bou guia policial.
E situacion di Otmar “Otty” Maduro tabata masha delicado mes, mirando cu el a keda
practicamente casi mey ora sin respiracion y e falta di oxigeno a causa basta daño cerebral.

Segun personanan den bisindario, e tabata hunto un amigo algun rato caba dilanti Tio Pepe. Un
dado momento a scuche ta bisa un otro amigo, un tal “Djodjo, “trece e caha pami” pero no tabata
sa di kico nan ta papiando. Maduro ta un pashent asmatico pisa cu semper ta cana cu su remedi
ventolin. Pero segun por a compronde, esaki no tabata su problema cu el a confronta diadomingo
anochi.

Su amigo tabata conta cu e tabata combersando cu Otty ora cu el a note straño, manera cu e tin
problema pa hala rosea. “Hinca dede den bo garganta si bo mester saca, mi a bise,” e amigo
desconsola tabata conta su mama, mientras cu e tabata expresa su decepcion pa con personal di
911 a atende cu pregunta sin sentido mientras cu e ta bisa nan cu Otty no tabata halando rosea
mas.

Un cabayero a yude bira Otty y e momento ey el a manera hala rosea y por a sinti un pulso hopi
swak. Pero hopi lihe esaki a disparce y personanan a cuminsa masashi su curason, sperando
yegada di Paramediconan.