Page 46 - MIN SJA

Fundacion Lanta Papiamento cu celebracion di Dia
Internacional di Idioma Materno dia 15 di februari

Saturday, 11 February 2017 21:32
Comparti

Diamars dia 21 di februari ta Dia Internacional di Idioma Materno cu UNESCO a proclama na aña 1993.
Ta mas cu claro cu Aruba tambe ta celebra e dia aki for di cuminsamento. Nos tin nos idioma
Papiamento, idioma materno di mayoria na Aruba cu pa hopi tempo a keda hala un banda, pero cu a sa
di sobrebibi. E idioma aki ta exigi un posicion importante den comunidad. Esey kiermen den enseñansa
tambe, como cu ta proba cu idioma materno ta e herment di mas importante pa uza ora di siña.
Ademas ta asina cu e idioma aki ta un creacion asina importante di nos hendenan, cu ta un crimen si
permiti pa e bay perdi. Fundacion Lanta Papiamento, cu ta celebra su di shete aniversario riba e fecha
aki, t’ey pa yuda nos hendenan siña aprecia e idioma bunita aki. Conocemento ta aporta na aprecio y
dedicacion. Mescos cu nos ta cuida nos medio ambiente, nos mester cuida nos herencianan cultural-
historico tambe, incluso Papiamento.
Den cuadro di e celebracion aki FLP ta organisa un anochi cu un charla interesante tocante e
documento di mas bieu di Aruba na Papiamento, esta Noos ta firma por la verdad, e declaracion di dia
22 di juni 1803. Orador Dr. Adi Martis lo duna un analisis historico di e documento. Dr. Martis a haci un
investigacion di entre otro tur e personanan menciona den e documento aki y tambe di e firmantenan
cu e por duna un bunita impresion di e bida na Aruba durante fin di siglo 18 y cuminsamento di siglo
19. Ramon Todd Dandaré Mag. Ling. lo papia di e aspectonan linguistico di e documento aki na un otro
ocasion. Keda pendiente di esey.
Jhon Freddy Montoya di Departamento di Cultura lo percura pa un bunita presentacion artistico.
Fundacion Lanta Papiamento ta invita henter comunidad di Aruba pa asisti na e evento aki cu ta tuma
luga: na Biblioteca Nacional Aruba den Madurostraat, diarason dia 15 di februari 2017, 7.30 – 10.00
anochi.
Entrada ta gratis.