Page 33 - AHATA

ORANJESTAD (AAN): Minister Xiomara Ruiz Maduro a duna di conoce den entrevista cu
BBO no ta bay subi. Pero el a remarca cu BBO na 6% ta temporal, den cuadro di e
“crisis-heffing”.

El a bisa cu ora di traha den un reforma fiscal ta bay tin “issues” cu e parti acumulativo
di BBO.

Como pais, bo tin algun escogencia. Kiermen, sea bo ta introduci “sales tax” of otro

impuestonan of otro maneranan pa haci esey, a indica.

El a sigui bisa cu IMF a bin Aruba y nan a duna nan advies ariba esaki. “Pero atrobe,
nan ta duna bo un conseho y abo tin cu traha algo pa bo pais”.

Esey ta e proceso cu ta andando aworaki, cual ta bira e miho sistema pa aki na Aruba.
Pareu cu Aruba, Corsow tambe ta trahando riba un reforma fiscal.

Locual ta pasando na Aruba no ta un caso isola. Diferente pais na mundo ta haci
cambionan. Hulanda mes a subi su BTW poco tempo pasa y paisnan rond di Aruba
tambe, a agrega.

Na Aruba no ta premira pa BBO bay subi. Pesey no mester crea e panico. “Berdad
cosnan a bira caro na Aruba, pero tin otro factornan tambe cu aworaki nos ta bezig ta
investigando pa e ora ey determina pakico esaki ta pasando, e minister a indica.

Ora cu a introduci BBO, Aruba no tabata cla administrativamente pa un belasting mas
complica. Aworaki cu ta bay haci e cambionan atrobe tin cu mira cu kico pais Aruba ta
cla, con por sigui bay dilanti pa introduci un sistema cu di berdad no ta bay haya un
inflacion cu ta bin hunto cune ora di haci un cambio den un belasting, a manifesta.

El a sigui bisa cu aworaki Aruba ta trahando riba un reforma fiscal. Cambionan tin cu
tuma lugar y ora esaki sosode no tur hende ta contento cune. Claramente ta bay haya
un oposicion cu ta haci fastioso.

“Aworaki nan mester brinda espacio pa nos haci”, a remarca.