Page 22 - KPA

NOTICIA DI POLIS: Caso

di menasa a bai na

detencion di dama ilegal

Published on April 20, 2017 in Policial
ORANJESTAD,Aruba

Dialuna atardi 3’or polis di Noord ta dirigi su mes pa un adres na Alto Visa pa motibo di un
bringamento cu a sali for di man. Na e sitio polis a papia cu e homber R. kende tabata
completamente trastorna y inquieto. Meneer R a bisa polis cu su bisiña tin un arma den su poder
y segun R. e bisiña a menase cu morto. Tambe menner R a declara cu tin hopi persona ilegal ta
biba na e adres ey y algun di nan ta tene nan mes ocupa cu prostitucion. Polis na su turno a dicidi
di bai serca e bisiña pero no a haya e homber cu meneer R. ta papia di dje. Polis despues a drenta
un mondi na e parti zuid di e cas pa busca e homber pero sin haya ningun hende.

Polis a bolbe bek na e cas na Alto Vista y a papia ey nan cu un muher di inicial B. kende a
mustra polis un paspoort legal di un homber di inicial O. y polis a puntra e señora unda e persona
O aki ta? E muher B a cuminsa jora y mustra hopi spanta y a bisa polis cu e homber O. a bai di e
sitio prome cu a jama polis di e problema cu a surgi cu e bisiña. Polis na su turno a pidi e dama
B pa su paspoort legal y ora cu polis a mira esaki e señora aki ta na Aruba for di 20 di mei 2016
y for di e tempo ey e no a sali mas for di Aruba.

Aki polis a tuma nota cu e señora aki a haci su mes culpabel di viola ley di L.T.U. polis a puntre
si e ta ilegal y e señora no por a contene su mes y cuminsa jora y bisa cu enberdad cu e ta ilegal
riba Aruba. Polis no a haci nada otro di detene e señora B y hibe warda di polis Shaba pa despues
pase pa Warda nos Costa. Polis a sigui na haci investigacion na e cas pero no a haya nada.
Mientras tanto e homber R. cu a jama pa polis a mustra polis cu e ta hopi spanta pasobra e la ser
menasa pa e bisiña di dje cu lo tire mata.Polis a bisa e homber R pa keda trankil y bai drumi. R a
mustra comprension di loke polis a pidie y ta bai su apartamento y sera e porta. Central di polis a
haya tur informacion kico a pasa.