Page 8 - DIGICEL

Ekipo ‘Monumnt’ ta ganador di ‘Hackathon Oranjestad’

Monday, 15 May 2017 21:15
Comparti

Resultado di Hackathon Oranjestad ta ‘Monumnt’, un aplicacion cu ya ta obtenibel caminda ta combina
tecnologia di 'augmented reality’
cu e atractivonan historico y comercial di Caya Betico Croes, pa crea un experiencia rico pa nos
bishitantenan, pero tambe pa nos mesun hendenan local.
Hackathon Oranjestad ta un iniciativa di Ministerio di Asuntonan Economico y Comunicacion hunto cu
Bureau Innovatie, KvK y VNO cu a join pa facilita y ehecuta e evento. Riba diabierna y diasabra ultimo,
cinco ekipo a kibra cabes den oficinanan di The Vault, pa bin cu ideanan cu por fomenta actividad
comercial den Caya Grandi.
Team Monument a consisti di: Sami Michl, Markson Maduro, Johan Jaimes, Franciëlle Laclé y Marco
Muscariello, tur hobennan profesional di Aruba. Maduro, kende tabata encarga pa haci e presentacion
durante e comptencia, a splica cu Monumnt ta duna bida na estatua, monumento of edificio, lagando
esaki papia di su mes, conta storia y tambe tin e capacidad di comparti descuento y ofertanan na e
comerciantenan participante. “Bo ta download e app, bo ta mustra riba e monumento y asina nos tin e
forma cu por intercambia local cu turista cu lo engage hopi trafico den caya,” e hoben a indica.
Tur miembro di Ekipo Monumnt a keda masha contento cu e formato di Hackathon Oranjestad y ta
considera un bon iniciativa pa bin cu algo nobo den Caya Betico Croes. “Como un ciudadano mi kier e
miho pa mi isla, cu mi por papia di mi isla rond mundo, pesey mi a tuma e iniciativa di participa den e
evento aki. Otro grupo tambe tabatin hopi creatividad y tabata un experiencia di nan profesionalismo y
loke nan ta haci,” asina Markson Maduro a duna di conoce.
Como ganador, ‘Team Monumnt’ ta ricibi Registracion na oficina di Propiedad Intelectual, pasashi y
registracion na e conferencia eMERGE America cu ta tuma luga na Miami, seis luna di espacio di oficina
na The Vault na Oranjestad, obsekio di Setar y tambe acceso na e socionan intelectual y tecnologico cu
Gobierno di Aruba tin na su disposicion. Di e manera aki Gabinete Mike Eman II ta traha cu nos
talentonan profesional na bienestar di Aruba su progreso.