Page 25 - AAA

Meteo ta investigando kico precies a pasa dicon no a saca un
shortnote Forecast diadomingo di e awasero torencial

Tuesday, 29 November 2016 22:27
Comparti

Ta net un siman cu Aruba a haya un awasero torencial. Director di Servicio Meteorologico,
Marck Oduber no tabata na Aruba e dianan ey.
Hopi hende no a spera e awa cu a pasa riba diadomingo siman pasa. Ainda ta bezig analisando
kico a pasa. Oduber ta haciendo esaki, pasobra e tabata na e reunion di Gosar, esta e satelite
nobo, y despues a wordo notifica di tur loke a pasa na Aruba. E awasero a cay basta hopi. A
registra na Westpunt casi 266 mm di awa. Sero Blanco tabata 105 y na aeropuerto 110 y
Hadicurari 88. E cantidad awasero e dia cu el a cay, riba dia 20, tabata hopi mes. Tabata tin
critica. Tin biaha critica no ta funda, pero tin biaha critica ta funda, pasobra e pronosticonan no
tabata indica e sey. Situacion ta cambia radicalmente tin biaha, pero loke tin cu haci ta saca un
shortnote forecast pa update e pueblo y esey tabata haci falta. Te ainda ta analisa kico a pasa
precies, pero e cambionan lo bay ta cu mester saca un shortnote forecast constant.
Esey no a sosode durante e tempestad. Tin algun reorganisacion cu tin cu bay sosode, pasobra
un awasero asina pisa cu no tabata tin daño humano, pero sigur e daño na placa ta hopi
grandi.
Si por corda, tempo cu e sistema di Meteo a daña na aeropuerto, tambe a costa basta placa y
mester a tuma medida. Den un sorto di situacion aki tin cu tuma medida. Si Meteo tabata tin
aparato pa saca boletin automatico y wak con bay drecha esey.
Por corda cu Corsou tambe a yega di haya hopi awasero tempo di Tomas, e ora Meteo a wordo
yuda door di Gobierno di Corsou cu hopi instrumento pa evita sorto di casonan ey. Pa Aruba
tambe mester cuminsa pensa e situacionnan eynan cu aunke cu por a haci tiki miho trabao,
toch mester mas aparato pa midi rond di Aruba y si e radar bin na 2017, esey lo yuda basta,
pero mester haci un inversion un tiki mas pa asina evita sorto di casonan cu si e ser humano
faya, e sistema automatico toch saca un aviso den termino corto, segun Oduber.
Awor aki mes a anuncia cu lo bin cu un alerta y cu hasta kisas por haya awasero pisa y tur
hende a prepara y nada no a pasa. Tin biaha ta bon pa splica debidamente cu no ta pasobra a
anuncia e awasero pisa, no ta nifica cu e ta pasa.
Oduber a splica cu e fin di siman aki ta condicionnan tabata faborabel pa awasero yobe atrobe,
entre un 10 pa 20 milimeter. Kico e problema tabata door cu e tera ta satura, e ora por haya
inundacionnan di periodo corto. Pesey tabata tin e aviso pa alerta pa inundacion di periodo
corto. Esey so ta bisa cu si awasero cay, por haya flashflooding. Pero e no tabata un alerta mes.