Page 32 - AWEMAINTA
P. 32
16 AWEMainta Diahuebs, 6 December 2018
Ekipa pa cualker eventualidad
E Comando Mobil lo t’e wowo n’e sitio di incidente
CU e Comando Mobil cu Cuerpo Policial a haya,
Polis lo ta mas mobil riba caya. Alto Inspector sr.
Adrick Croes a comenta cu nan meldkamer awor por
ta movibel y p’asina por tin control y maneha esaki
n’e sitio di incidente mes.
E ta facilita tambe otro departamentonan di
emergencia pa por sinta hunto y dirigi e unidadnan
n’e sitio di incidente.
Cu e Comando Mobil aki, e ta facilta cu e trabou
di maneho, eficencia y organisacion n’e sitio lo ta
mucho mas mihor coordina. Si un calamidad mester
pasa na Aruba y tur e wardanan no ta acesibel y e
comunicacion mester bay plat, e unidad mobil aki lo
bay den accion y por yega na tur skina di Aruba. E lo
bira manera un Warda di Polis mobil p’asina mantene
y tin wowo riba e seguridad nacional di pais Aruba,
segun splicacion di Alto Inspector Aldrick Croes.
Comando Mobil cu Aruba a haya a wordo fabrica
na Merca p’e compania MBF Industries Inc. E
Comando Mobil aki t’e prome pa yega den Caribe
den e forma special aki y e prome pa wordo usa den
nos region.
E ta specialisa pa ta uno policial y traha special
pa Aruba cu por wordo usa den nos clima. E
preparacion di Comando Mobil ta bin ta encamina
despues di algun tempo p’asina por prepara y traha
un Comando Mobil n’e necesidad di Cuerpo Policial
Aruba. E t’asina moderno cu e por ricibi y manda
signal, comunica cu diferente departamento di
emergencia y e ta mobil rond di e isla.
E compania MBF Industries Inc ta sumamente
agradeci cu a escoge nan pa por brinda un unidad
mobil cu tecnologia avansa pa un organisacion
policial y ta mas sorprendi e caluroso bon bini cu e
compania a haya na Aruba. Sr. John Lambert a bin
Aruba hunto cu e Comando Mobil p’asina train e
agentenan cu lo haci uso di dje y demostra tambe
con e Comando Mobil ta funciona.
Cu esfuerso y bon colaboracion di Aruba Hospitality
& Security Foundation Cuerpo Policial a ricibi e
adkisicion nobo aki. Aruba por ta orguyoso di por
tin e prome Comando Mobil den region.
