Page 5 - MIN VOS_Neat
P. 5
ORANJESTAD (AAN): Durante dos dia Secretaria General di COA, sra. Nicole Hoevertsz
tabata di bishita na e scol secundario, EPB Oranjestad pa asina comparti informacion cu
e alumnonan, unda a hasi nan mas conciente di e historia di Weganan Olimpico. A
conta e alumnonan pakico deporte ta un materia asina importante y kiko realmente ta
nifica participa como atleta na Weganan Olimpico. Den e cuadro di lesnan informativo
pa e alumnonan sra. Hoevertsz a wordo invita pa bin duna un lectura riba e tema tan
importante aki, cual hopi di nos muchanan hoben ta aspira un dia pa yega. Mas cu claro
e presentacion no por a bay sin e materialnan di muestra, manera entre otro e uniform
di e delegacion Arubano, pins, posternan Olimpico, medalla, bukinan, e mascotanan di
e diferente weganan, y e replica di e famoso antorcha nan cu ta uza tradicionalmente
pa inaugura e Weganan Olimpico. Na final e alumnonan a haya e presentacion hopi
interesante y a hasi un cantidad di pregunta na Sra. Hoevertsz. Mester bisa cu e
alumnonan tabata masha interesa den e topico mientras e mayoria ta practica deporte
y algun hasta ta afilia na un of mas organisacion deportivo na Aruba. Mas cu claro e
alumnonan a tuma tempo pa saca algun foto cu sra.Hoevertsz y tambe cu e
materialnan Olimpico. Comite Olimpico Arubano kier a gradici EPB Oranjestad y muy en
especial docente Hellen Wilemsen-Leijdekkers pa e oportunidad brinda.
