Page 15 - MIN ARENDS

Directora Di Camara Di Comercio, Sonia Veldhuizen

Ta Mira E Balor Agrega Di Qredits

 Local
- 11/04/2017

Sra. Sonia Veldhuizen, directora di Camara di Comercio, tabata un di e personanan cu a
pusha duro pa Qredits yega Aruba. Desde un prome instante Veldhuizen tabata envolvi
den forma positivo y unda e tabata por el a duna su sosten. Pesey mes cu e tabata cana cu
un sonrisa grandi riba su cara dia cu e instituto financiero non profit Qredits cu ta brinda
micro krediet na start ups y entrepreneurs, a habri su portanan den MFA Noord.

“Camara di Comercio ta hopi contento cu e desaroyo aki. Mayoria di entrepreneurs cu ta
bin cerca nos ta bisa nos cu nan problema pa cuminsa nan propio negoshi ta cu nan no ta
haya financiamento. Yegada di Qredits ta trece un cambio den esey.

Pa loke ta coaching y educacion cu e instituto ta brinda, nos ta mira esey como un balor
agrega. Nos ta bay purba di incorpora entrepreneurship den e curriculum di scolnan.

Esaki ta pa studiantenan sa cu entrepreneurship ta un opcion pa nan tambe.

Nan no mester traha pa un hefe si nan no kier esey, pero por lanta nan propio compania”,
sra. Veldhuizen a splica e punto di bista di Camara di Comercio.

E ta haya e combinacion di brinda financiamento, coaching y enseñansa uno hopi bon.
Esaki ta importante pa e comunidad comercial di Aruba. Pa loke ta enseñansa, splica e
hoben empresario con start un negoshi ta algo cu Kamer ya a cuminsa cu ne caba.