Page 26 - AWEMAINTA

26 AWEMainta Diabierna, 19 Mei 2017

Francis Odor ta un

enfermero ehemplar

Durante siman di enfermeria el a sali empleado di luna di Hospital

E luna aki a eligi Francis Odor, enfermero na ICU esta “Intensive
Care Unit” como empleado di luna. Durante Siman di Enfermeria
director di cuido na Dr. Horacio E. Oduber Hospitaal, sr. Ezzard Cilié
tabatin e honor di otorg’e su certificado.

“Nos ta hopi contento, pasobra Francis Odor ta un nurse cu ta traha
masha duro. E ta motiva tur su coleganan, e ta yuda, y e ta duna les”,
asina Zorgmanager di ICU, sr. Gino Paskel a remarca. Francis Odor
ta forma parti di e comision di CPR di Hospital y e ta hopi activo
den e grupo BHV (bedrijfshulpverlener) di Hospital.
Rib’e piso mes tur hende ta hay’e amabel, un bon colega y e ta haci
su trabou hopi bon y profesional. E ta trece trankilidad den momen-
tonan di crisis y p’esey e ta un colega masha aprecia.

Francis ta den servicio di Hospital desde augustus 2002, pues lo
celebra su 15 aña di aniversario e aña aki. El a desaroya su mes di
enfermero general pa un enfermero specialisa den ICU.
Un enfermero cu ta confiabel, digno y bon prepara. Francis tin un
pasion grandi pa su trabou y hasta ta comparti su conocemento dor
di duna les den BLS (Basic Life Support) y ACLS (Advanced Cardiac
Life Support).

Francis Odor no tabata sa cu el a sali e empleado di luna y esaki ta-
bata un sorpresa p’e.
“E tabata un sorpresa y mi no a sper’e. Net nan a pidi mi pa bay duna
les y na mi yegada mi a mira batayon di hende hunto bisando cu mi
ta empleado di luna”, Francis Odor a remarca.
E ta haya esaki algo great y e ta honra pa ta e empleado di luna.
“Mi ta kere cu awendia tin posibilidad di sigui studia na Aruba mes
pa loke ta medicina.
E posibilidad ta amplio. Prome cu dicidi di bay studia afo, ta bon pa
mira e posibilidad pa studia aki na Aruba unda cu tin un bon hospital,
ekipa cu hopi material y ekiponan moderno”, Odor a duna di conoce.

Francis Odor a demostra di tin un pasion grandi pa su trabou y a
ricibi e reconocimento aki bon mereci, masha pabien!