Page 4 - Aureus University School of Medicine a dedica

Aureus University School of Medicine a dedica
“Administrative Wing” na Roy Brown

Sunday, 27 November 2016 10:24
Comparti

Tabata 22 aña pasa cu mr. Roy Brown a construi e edificio na Wayaca, cu a bira conoci como Brown Building. Esaki
tabata su oficina y e oficinanan di su yiunan, unda cu nan a traha tambe pa basta aña. Un dia dr. Gurmit Singh
Chilana a aserk’e pa cumpra e edificio pa establece e scol di medicina, Aureus University School of Medicine.

Den transcurso di añanan, e relacion entre Roy Brown y e scol a keda crece y recientemente e scol a dicidi cu nan kier
a honra nan amigo, sostenedo, mentor y guia dedicando un “wing” di e edificio di e universidad na su persona. Den
presencia di su señora y su yiu homber, mr. Patrick Brown, a devela e plakkaat instala riba e porta di e gang na e
parti di e edificio cu awo ta hiba su nomber. Esaki a bira “Brown Administrative Wing”.

Abogado Roy Brown a comenta cu e ta sinti su mes masha honra cu a dedica un hala di e edificio na su nomber. El a
remarca: “Mi ta spera cu e ta duna nan mesun hopi suerte cu ami tabatin den mi bida”. Dr. Chilana a agrega cu e scol
a honra Roy Brown pa su amistad, pa ta un mentor y un guia, pa su contribucionnan na e universidad y nan bida. El
a sigui bisa cu Roy Brown semper tabata t’ey pa nan ora cu nan tabatin mester di dje, semper e tabata un consehero
honesto.

Aureus University School of Medicine a establece na Aruba na aña 2005 na Hato cu solamente 3 studiante, pero a
muda despues pa e localidad na Wayaca na aña 2012. Awendia, despues di 11 aña, e scol ta conta cu mas o menos
500 studiante y 15 docente cu ta duna les di dialuna pa diabierna for di 8:30am pa 3:30pm.

Mayoria studiante ta procedente for di Merca, pero tambe hopi ta bin di Canada y tur parti di mundo. E scol ta ofrece
dos programa, un di 4 aña y otro di 5 aña. Den ambos caso mester studia mita di e periodo na Aruba y e otro mita na
Canada of Merca. Na momento cu termina e estudio, ta bira un “basisarts” pues ainda mester specialisa.

E demanda pa scolnan di medicina den Caribe ta masha grandi, pasobra ta masha dificil pa haya un cupo pa studia
medicina na Merca. Mas ainda, den Caribe ta mas economico, mas cerca, miho clima pa studia aden, mas siguridad y
cerca di e continente Americano. Entretanto e scol tin un cantidad di storia di exito, di ex studiantenan cu ya ta
practicando medicina caba na Merca y Canada. Awendia tin ex studiante cu ta dunando les como docente na e mesun
scol. Na tur 7 studiante Arubiano a pasa dor di e estudio, di cual 2 a gradua caba!

E plannan di Aureus University School of Medicine ta pa sigui expande, sigui desaroya, hisa e calidad y haya mas
acreditacion posibel, cu ta habri mas opcion pa studiantenan na momento di sigui specialisa. Ya caba a cumpra un
tereno na Wayaca unda lo construi un edificio pa aloha 100 studiante pa e periodo di nan estudio.