Page 3 - MIN ON

Interes di Aruba Investment Bank ta pa drecha e ruina di
John F. Kennedy School y despues huur cu Gobierno

Tuesday, 28 February 2017 08:57
Comparti

Aruba Investment Bank a wordo funda 30 aña pasa. Esnan cu a funda e banco a pone den nan mision
como nan statutonan cu nan tin un rol special economico. Frendsel Giel, director di e banco, a menciona
cu den cuadro di e rol ey a wordo acerca pa partidonan pa mira kico nan por haci pa yuda na entrada di e
turistanan na Playa, caminda cu tin un ruina para pa masha hopi aña.

Den e caso ey a papia cu Gobierno kico por wordo haci. Tin un compania cu AIB a funda basta aña atras,
cu yama AIB Vastgoed. Kier habilita e compania aki y a bin e idea pa por cumpra John F. Kennedy
School, renoba e facada cu tin eynan, hunto cu dos edificio mas cu lo bin. Gobierno a mustra di ta
dispuesto pa ubica Departamento di Enseñansa eyden. AIB lo trah’e y Gobierno lo cera un huur normal
di cinco aña pa loke ta bay padilanti. A haya esey cu ta algo cu nan lo ta interesa pa haci. E interes tabata
mas parti pa haci algo cu e ruina, drech’e. E facada riba su mes ta monumental. Kier percura cu e ta tuma
luga tambe. E facada ta keda y hunto cu esey ta bin dos edificio moderno y cu lo contribui na e cara di
Aruba y siguramente tambe lo mustra cu ta sigui cu nan mision economico social pa loke ta
embeyecimento di Aruba y ta proteha nos monumentonan tambe. Ora cu a tuma e proyecto aki, a bisa
gobierno, a base di un evaluacion independiente, cuanto e edificio ey lo costa. Ta paga e prijs segun e
taxatie di dje. E momento ey ta haci un invitacion na cuater compania pa duna un prijs basa riba e
mapanan cu ta pinta na e momento ey. AIB a duna nan un fecha tambe.

Tabata tin un inlichting vergadering na cuminsamento di januari, Den esey a entrega algun informacion
pa asina nan por conclui pa duna un oferta pa dia 24 di Februari. Ta spera cu por logra e dia ey ainda.
Sino e lo ta kisas un siman mas despues cu e meta pa conclui un acuerdo pa mas tarda na fin di Maart, pa
construccion por cuminsa inmediatamente despues, Giel a splica. Ta spera cu e construccion eynan por
dura 18 luna. AIB como partner den sector priva, lo tene un bon bista pa e proyecto aki wordo realisa,
den cuadro di e programa van eisen cu nan ta pone pa e contratista. A caba di cera un contracto cu un
toezicht houder cu lo tene supervision pa e banco. E proyecto ta algo cu ta concretisa y hopi serio y e ta
andando caba, segun Giel.