Page 25 - KPA

36 AWEMainta Diabierna, 16 December 2016

Prome Minister Mike Eman

Rotonde ta trece seguridad,

facilidad y un miho ambiente

pa bario di Madiki y Paradijs

DIAHUEBS mainta, Minister President Mike Eman a realisa
reapertura di rotonde na Driemasterstraat/Santa Helenastraat
hunto cu colega Benny Sevinger.
E mandatario ta sumamente contento cu e trabou haci di parti
di DOW y contratista local Thiel Corporation, pero tambe
pa e habitantenan cu awo lo gosa di mas seguridad y bunita
infrastructura.

“Pa nos esaki ta otro proyecto cu ta realisa pa haci trafico mas
sigur”, asina Premier Eman a comenta.
“Pa nos tabata motibo di preocupacion pa hopi aña dor di e
cantidad di accidente cu tabata sosode aki y awe cu tin e rotonde
ta spera cu trafico lo bay mas lihe, y mas importante mas sigur.”
Prome Minister a remarca cu e parti di embeyecemento rond
di e proyecto ta un bonus pa e casnan rond di dj’e den Madiki
y Playa Pabou.

E mandatario ta felicita tur cu a traha duro y e tin un aprecio
grandi pa e trabou cu a wordo haci. E reapertura a keda realisa
dor di su persona y Minister Sevinger di un manera simbolico.
Ambos, hunto cu ayudo di algun bisiña a kita e baricadanan pa
permiti e trafico cuminsa circula bek. Asina mes, Premier Eman
ta duna credito na pueblo pa e progreso cu Aruba ta conociendo.

“Esaki ta un trabou di e pueblo Arubano cu a pone nos na e
posicion pa haci esaki posibel y awe un gratitud na comunidad
pa e confiansa pa e bon trabou por continua.

Pa nos esey ta e mandato, esta pa traha pa mehora e calidad di
bida di e ciudadanonan”, Minister President a finalisa bisando.