Page 57 - KPA

Polisnan Maritimo a scapa bida di dos turista riba lama

Thursday, 15 December 2016 21:37
Comparti

Diaranson Polis Maritimo a scapa 2 turista di e barco Carnival Sunshine, cu a huur waverunner di
Caribbean Watersport.
A bati alarma pa 5:30pm cu un persona ta mira 2 persona a cay di waverunner na un distancia di mas o
menos 500 meter for di tera, pabao di Amsterdam Manor. El a mira cu e waverunner a drief bay sin
hende riba dje.
Mesora Central di Polis a activa y a manda un patruya di Polis Maritimo pa bay brinda asistencia. E dos
patruyanan BP-4 y BP-5 cu ta waverunnernan di Polis y cu tabata patruyando den e area a yega mesora
na e sitio. Patruyanan den auto a yega na e area den 2 minuut di tempo pa tin mas bista for di canto.
Asina riba lama e Polisnan Maritimo a topa e dos hendenan so den awa, nan tabata hopi spanta y den
panico casi pa hoga.
E waverunner mes tabata leu for di e turistanan y door di stroming y biento tabata imposibel pa yega na e
waverunner bek. Polis Maritimo a yuda e dos personanan aki, saca nan for di awa y transporta nan pa
tera. Na tera Polisnan a hala atencion di e compania Caribbean Watersport pa nan ta mas pendiente di
nan waverunnernan ora nan huur cu turista.
Polis Maritimo a duna e compania Caribbean Watersport e posicion mas o menos unda e waverunner di
e turistanan lo tabata drif pa e compania mes bay busk’e.
E dos mucha turistanan a keda masha contento cu e actuacion rapido di Polis, cu a salba nan den e
situacion di panico y spanto cu nan tabata encontra nan mes aden. Ta trata aki di e mucha muhe di
inicial N.P. naci na Merca di 13 aña di edad y E.S. tambe naci na Merca di 37 aña di edad.