Page 53 - ECEM

Segun e minister, su persona como responsabel di Telecomunicacion, el a wordo
informa door di e director y e Raad van Comissarisen y cu lo cuminsa un
investigacion ya cu na final di dia tur hende ta inocente te ora cu nan demostra
su culpabilidad. Den e caso aki e empleado lo ta riba e lista aki. Den e
investigacion aki a bin dilanti cu tin cosnan no corecto lo por a tuma luga y a
sigui analisa esaki cu expertonan local y internacional y haya mas informacion.
Cierto momento den e procedura aki, a yega un momento cu Setar a tuma e
decision cu ta retira e persona aki for di trabao, pero a sigui traha ariba e
caso te ora cu e articulo a sali den Miami Herald, cual a bira un discusion
publico.
Por a tuma nota, segun Minister de Meza, cu ta haci sensacion di esaki paso ta
kere cu pa cualke politico den 2017 mester sa cu e tipo di casonan aki ta tuma
seriedad. E tin su procesonan cu mester cana den esaki. Hopi biaha no por duna
tur informacion, no solamente cu e tin di haber cu Aruba pero ta un compania
estatal. Pero na mes momento mester respeta e proceso di investigacion, sea ta
caso local of internacional. Y e abogadonan tambe ta duna e conseho ey.
Ora cu director di Setar a notifica e minister, el a sostene nan y a bisanan cu
mester cana e proceso den e procedura mas corecto cu tin. Na final di dia,
mester mira con por recupera dañonan. Tin e parti material y esaki ta loke e
compania ta responsabel p’e. E minister ta enfatisa cu Setar a prueba di a cana
e camindanan corecto y ta haci investigacionnan profundo y costoso, pero
inaceptabel cu un empleado di un compania estatal, como gobernante y director
di un compania estatal pa e tipo di practicanan aki tuma luga, segun minister
Mike de Meza.
Na momento cu e persona su nomber a sali ariba lista di Panama Papers, a
cuminsa cu e investigacion y esaki ta tuma su tempo y mester respeta cada
ken. Mester haci e investigacion prome, y no specula riba informacionnan cu ta
bin dilanti. Ta sigui recomendacionnan di expertonan local y internacional.
Mester tene cuidao pa no dificulta e investigacion.
Tabata e decision di Minister y di Setar mes pa tene e asunto keto y despues lo
a duna informacion. Si prensa internacional no a sak’e, pueblo di Aruba lo no a
wordo poni na altura di e asunto aki.